ახალციხის მერიაში გასაუბრება ერთმა თანამშრომელმა ვერ გაიარა

ქალაქ ახალციხის მერიაში საჯარო მოხელეთა შესარჩევი კონკურსის მეორე ეტაპზე 257 აპლიკანტი გადავიდა, თუმცა ტესტირებაზე მხოლოდ 164 მათგანი გამოცხადდა. ტესტირება წარმატებით 114 კონკურსანტმა ჩააბარა. შესაბამისად, საკონკურსო – საატესტაციო კომისიის წინაშე 114 კონკურსანტი უნდა წარდგენილიყო, თუმცა ექვსი აპლიკანტი გასაუბრებაზე არ გამოცხადდა.

108 კონკურსანტიდან გასაუბრება 63 აპლიკანტმა ვერ გაიარა, ამათგან ერთ–ერთი ბიუჯეტის დაგეგმის საკითხებში მერიის მთავარი სპეციალისტი იყო. როგორც მერიის ადმინისტრაციის სამსახურის უფროსი ნინო მიქაბერიძე ამბობს, აღნიშნულ პოზიციაზე ახალი თანამშრომელი უკვე შერჩეულია: „19 იანვრამდე აქვს საბუთების წარდგენის ვადა, როგორც კი დოკუმენტებს მოიტანს, დაინიშნება აღნიშნულ პოზიციაზე“.

შეგახსენებთ, რომ 4 ვაკანსია ქალაქის საკრებულომ 2014 წლის 30 სექტემბერს, 44 კი მერიამ 7 ოქტომბერს გამოაცხადა. 48 ვაკანსიაზე 324 განმცხადებლის 757 განცხადება შევიდა. თითოეულ განმცხადებელს საბუთების წარდგენა რამდენიმე ვაკანსიაზე შეეძლო.

[მანანა სარაშვილი, ახალციხე]