მოხეში სადავო შენობის წარმომავლობის დამდგენი კომისია 23 მარტს მეხუთედ შეიკრიბა. შეხვედრა დახურული იყო და კომისიის წევრები „სამხრეთის კარიბჭესთან“ შეხვედრის დეტალებზე არ საუბრობენ.
„ვმუშაობთ იმ დეტალებზე, რომ ყველაფერი გადაწყდეს მშვიდობიანად. მრევლს შევარიგებთ და ყველაფერი მოგვიანებით გასაჯაროვდება“, – ამბობს დასავლეთ საქართველოს მუფთი ბეგლარ ქამაშიძე.
„ყველაზე მეტად გვინდა საზოგადოება შევარიგოთ და შევაყვაროთ ერთმანეთი. ამის შემდეგ შენობასაც მიეცემა სტატუსი რა თქმა უნდა. ალბათ კვლევები დაგვიმტკიცებს მომავალში ყველაფერს“, – ამბობს სამცხე–ჯავახეთის მუფთი მამუკა ვაშაყმაძე.
მისივე თქმით, სავარაუდოდ, კომისია დასკვნას ორ თვეში გამოიტანს: „მუსლიმი მრევლის გულისტკივილი და გულისწყრომა არ არის ჩამცხრალი. ამასთან ერთად მართლმადიდებლების პროტესტსაც ვითვალისწინებთ. არ გვინდა გართულდეს ვითარება და მაქსიმალურად ვარიდებთ თავს. ჩვენ გვინდა სამართლიანობა აღდგეს“.
ამ სხდომაზე კომისიის მუშაობაში საქართველოს სახალხო დამცველი უჩა ნანუაშვილი უნდა ჩართულიყო. მის ჩართვას კომისიის წევრად თავად კომისია ითხოვდა. ნანუაშვილის ჩართვის შესახებ გადაწყვეტილება კომისიამ 2014 წლის 27 დეკემბერს გამართულ სხდომაზე მიიღო და ამის შესახებ ნანუაშვილს წერილობითაც ეცნობა. თუმცა, როგორც სამცხე–ჯავახეთის მუფთი მამუკა ვაშაყმაძე აცხადებს, მან კომისიის წევრობაზე უარი განაცხადა.
სახალხო დამცველის მოადგილე ნათია კაციტაძე ამბობს, რომ სახალხო დამცველის აპარატი კომისიაში მხოლოდ დამკვირვებლის სტატუსით შეძლებდა ჩართვას და ამას ითხოვდა კიდეც. კომისიას კი მისი წევრად ჩართვა სურდა.
„მოლაპარაკებები სახალხო დამცველის აპარატს რელიგიის სახელმწიფო სააგენტოსთან ჰქონდა. ჩვენ დავუსაბუთეთ, რომ კონსტიტუციით და ორგანული კანონით განსაზღვრული სახალხო დამცევლის მანდატიდან გამომდინარე, კომისიის წევრის სტატუსი ვერ გვექნებოდა. ამიტომ გამოვთქვამდით მზადყოფნას, რომ ჩავრთულიყავით დამკვივრებლის სტატუსით და ეცნობებინათ შემდგომი სხდომის შესახებ. ეს იყო თებერვალში და ამის შემდეგ მათგან არანაირი პასუხი არ მიგვიღია“, –ამბობს ნათია კაციტაძე.
მისი თქმით, საუბარი არ ყოფილა იმაზე უჩა ნანუაშვილი მიიღებდა კომისიის მუშაობაში მონაწილეობას თუ არა: „პიროვნებებზე არ იყო საერთოდ საუბარი, რადგან სააგენტო ვერ მიხვდა ჩვენ რა სტატუსით გვინდოდა მონაწილეობა . სააგენტოს ჰქონდა თავისი არგუმენტები თუ რატომ უნდა ჩართულიყო აპარატი კომისიის მუშაობაში წევრის სტატუსით, თუმცა ჩვენი აზრით ეს იყო უსაფუძვლო. ჩვენ იმაზეც ვერ შევთანხმდით, სახალხო დამცველი საერთოდ იქნებოდა თუ არა ამ კომისიაში“.
„სამხრეთის კარიბჭე“ რელიგიის სახელმწიფო სააგენტოსგან კომენტარს ორი დღეა ელოდება. საზოგადოებასთან ურთიერთობის სამსახურის წარმომადგენელმა ლელა ფირანიშვილმა განგვიმარტა, რომ დაგეგმილი შეხვედრების გამო ამ დრომდე ვერ ხერხდება ჩვენს მიერ გაგზავნილ კითხვებზე პასუხის გაცემა.
შეგახსენებთ, რომ მოხეში სადავო შენობის წარმომავლობის დამდგენი კომისია გასული წლის 2 დეკემბერს შეიქმნა. კომისიაში თავიდან 11 წევრი იყო. 27 დეკემბერს კომისიამ ორი წევრის დამატების გადაწყვეტილება მიიღო.კომისიის მეორე ახალი წევრი, სამუფთო სამმართველოს წარმომადგენელი, ოთარ ნადირაძე მუსლიმი თემის ნდობით აღჭურვილი პირია.
[თინათინ ზაზაძე, ადიგენი]