ახალციხის საკრებულოში თანამდებობრივი სარგოები ბიუჯეტის ანალიზის გარეშე დაამტკიცეს

ახალციხის მუნიციპალიტეტის საკრებულოს სხდომაზე, რომელიც გუშინ, 22 ივლისს გაიმართა, ის საკითხები განიხილეს, რაც წინა დღეს ვერ მოასწრეს. კერძოდ, საკრებულოსა და გამგეობის დებულებები, თანამდებობრივი სარგოების ოდენობა და გამგეობის აპარატის საშტატო ნუსხა.

ფრაქცია „ერთიანი ნაციონალური მოძრაობის“ წევრებმა თანამდებობრივი სარგოების ოდენობისა და აპარატის საშტატო ნუსხის დამტკიცებას მხარი არ დაუჭირეს.
ფრაქციის თავმჯდომარის მარინე სუდაძის თქმით, ვიდრე ამ საკითხებს დაამტკიცებენ, კარგი იქნება ბიუჯეტის შეისწავლონ.

„გამგებელს ვკითხეთ, რომ სანამ აღნიშნულ დებულებებს შეადგენდნენ თუ გააკეთეს ბიუჯეტის ფინანსური ანალიზი და თუ არის შესაძლებელი რომ გაზრდილი საშტატო რაოდენობის პირობებში გასცენ ხელფასები, თუმცა, როგორც გაირკვა მსგავსი კვლევა არ ჩატარებულა. მესმის, რომ მუშაობა დაჩქარებულ პირობებში უწევთ, მაგრამ უფრო კარგად წარმომიდიგენია რა დიდი საფრთხის წინაშე შეიძლება დადგნენ მომავალში. საკითხს მხარი სწორედ ამიტომ არ დავუჭირეთ“, – ამბობს მარინე სუდაძე.

მისივე თქმით, დებულებები მოუმზადებლად იყო შედგენილი: „საკრებულოს აპარატი შეტანილია გამგეობის საშტატო ნუსხაში, რაც არასწორია. ვფიქრობ, რომ საკრებულოს აპარატის მაგივრად უნდა ეწეროს გამგეობის აპარატი. ცუდია, როცა სხდომაზე მოუმზადებელი საკითხები შემოდის“.

ახალციხის მუნიციპალიტეტის გამგეობის იურისტმა თამარ გოგინაშვილმა აღნიშნული მექანიკური შეცდომით ახსნა.

[მანანა სარაშვილი, ახალციხე]