სამცხე–ჯავახეთის უნივერსიტეტი რესპუბლიკურ კონფერენციას მასპინძლობს

კონფერენცია საქართველოს პრეზიდენტის ფონდის მხარდაჭერით ტარდება. მას ბოლნისის, გარდაბანის, დმანისის, მარნეულის, დედოფლისწყაროს, ბორჯომის, ასპინძის, ახალქალაქის, ნინოწმინდის, წალკის, ადიგენისა და ახალციხის საჯარო სკოლის პედაგოგები, ზურაბ ჟვანის სახელობის სახელმწიფო ადმინისტრირების სკოლა, სახელმწიფო ენის პროგრამის სწავლების წარმომადგენლები, ახალციხისა და ტაო – კლარჯეთის მიტროპოლიტი, კათოლიკოს – პატრიარქის ქორეპისკოპოსი მეუფე თეოდორე, საქართველოს განათლებისა და მეცნიერების სამინისტროს წარმომადგენლები, საქართველოს პარლამენტის წევრი ზაქარია ქუცნაშვილი და ქალაქ ახალციხის მერი და ახალციხის მუნიციპალიტეტის გამგებელი ესწრებიან.

„შევხვდით იმ პედაგოგებს, რომლებსაც უზარმაზარი მისია აქვთ, ასწავლიან ქართულ ენას სამცხე–ჯავახეთის სკოლებში. მე დავესწარი ამ კონფერენციას იმისთვის, რომ მათთვის მადლობა გადამეხადა“ , – ამბობს საქართველოს პარლამენტის წევრი ზაქარია ქუცნაშვილი.

ვიდრე კონფერენცია სექციებად დაიყოფოდა, პროგრამის – „ვასწავლოთ ქართული, როგორც მეორე ენა“ მონაწილე პედაგოგებმა პროგრამის დადებით მხარეებზე ისაუბრეს და სამინისტროსა და მთავრობის წარმომადგენლებს პროგრამის გაძლიერებისკენ მოუწოდეს.

„25 წელია ჯავახეთში ვმოღვაწეობ, მახსოვს ამ პერიოდში კიდევ გვქონდა პატარა კონფერენციები, სადაც ჩვენ პრობლემებზე ვისაუბრეთ და შედეგიანიც იყო. დღესაც არის გარკვეული პრობლემები. საათები საკმარისია, პედაგოგებიც ძლიერი გვყავს, მაგრამ არაქართულ სკოლებში აუცილებელია სახელმძღვანელოების გამოცვლა, თუ ეს პრობლემა არ მოგვარდა, რამედნიმე საფეხურით უკან დავიწევთ“, – ამბობს ფოკის საჯარო სკოლის პედაგოგი კლარა ფოცხვერაშვილი.

კონფერენციაზე მომხსენებლები განათლებაზე, როგორც აღზრდის მეცნიერებაზე, ბილინგვურ განათლებასა და საგნის სწავლების მეთოდიკაზე ისაუბრებენ. კონფერენცია ექვს სექციად დაიყო, თითოეულ სექციაში 10 – 12 მომხსენებელია.

[მანანა სარაშვილი, ახალციხე]