სამცხე–ჯავახეთის უნივერსიტეტმა რესპუბლიკურ კონფერენციას უმასპინძლა

კონფერენციაზე სამცხე–ჯავახეთის სახელმწიფო უნივერსიტეტის ყოფილი თანამშრომლები, პროფესორები: ვალერი სილოგავა და სერგო მელიქიძე გაიხსენეს. კონფერენციას მათი ოჯახის წევრებიც ესწრებოდნენ.

„ორივე შესანიშნავი ადამიანი იყო. ორივე ფუძემდებელი იყო ჩვენი უნივერსიტეტის. მათთვის მიძღვნილ კონფერენციზე განვიხილავთ ონომასტიკის პრობლემებს. თითოეული სახელის, გვარის, წარმომავლობის, ქუჩის კვლევა ძალიან მნიშვნელოვანია დღეს საქართველოსათვის. მიმაჩნია, რომ საქართველოს ონომასტიკოსების ახალციხეში შეკრება საეტაპოც კი იქნება, აქ განიხილება არა მარტო რეგიონის, არამედ საქართველოს პრობლემები“, – ამბობს სამცხე–ჯავახეთის სახელმწიფო უნივერსიტეტის რექტორი მერაბ ბერიძე.

კონფერენცია სექციებად მიმდინარეობდა. დღის ბოლოს კი შემაჯამებელი სხდომა გაიმართა.

„ისტორიულად ეს კუთხე იმდენად დატვირთულია საოცარი ამბებით, რომ აქ მეტია საკვლევი მასალა. მომავალი თაობისათვის ამ შეხვედრას ძალიან დიდი მნიშვნელობა აქვს“, – ამბობს ზუგდიდის შოთა მესხიას სახელობის სასწავლო უნივერსიტეტის პროფესორი რევაზ შეროზია.

შეგახსენებთ, რომ დღესვე, სამცხე–ჯავახეთის სახელმწიფო უნივერსიტეტში, ამავე სასწავლებლის ყოფილი თანამშრომლის, პროფესორ ვალერი სილოგავას სახელობის კაბინეტი გაიხსნა. კაბინეტში ძირითადად ეპიგრაფიკული კვლევები ჩატარდება.

გარდა ამისა, ვალერი სილოგავას სახელი მიენიჭება ახალციხეში,ზარზმელის ქუჩაზე ასასვლელ აღმართს.



[თინათინ ზაზაძე, ახალციხე]