ახალციხის გამგეობა ბულდოზერს და ნაგავმზიდს ყიდულობს

დღეს, 28 ნოემბერს ახალციხის მუნიციპალიტეტის საკრებულოს რიგით მეათე სხდომა გაიმართა, სადაც დეპუტატებმა ექვსი საკითხი განიხილეს. აქედან ძირითადი საკითხები ახალციხის მუნიციპალიტეტის 2014 წლის ბიუჯეტში შესულ ცვლილებებს ეხებოდა.

ახალციხის მუნიციპალიტეტის გამგეობის საფინანსო – საბიუჯეტო სამსახურის უფროსის გელა ლომიძის თქმით, ახალციხის მუნიციპალიტეტის 2014 წლის ბიუჯეტში გაიზარდა შემოსავლები, რის გამოც ბიუჯეტში გარკვეული ცვლილებები შევიდა.

„ბიუჯეტში შემოსავლები 137 ათასი ლარით გაიზარდა, ასევე ეკონომიის ხარჯზე შემცირდა რიგი მუხლები, კერძოდ ხელფასებიდან დავზოგეთ 25 746 ლარი, 18 ათასი ლარით შემცირდა საგზაო ინფრასტრუქტურის თანხები. ასევე თანხა დაიზოგა კომუნალურების ხარჯშიც. შეგვიმცირდა შტატგარეშე მომუშავე თანამშრომლების ანაზღაურება 4 ათასი ლარით“, – განმარტავს გელა ლომიძე.

საკრებულოს სხდომას ახალციხის მუნიციპალიტეტის გამგებელიც ესწრებოდა. ზაზა მელიქიძის თქმით, ბიუჯეტში გარზდილი შემოსავლებით გამგეობა ბულდოზერის და ნაგავმზიდის შეძენას გეგმავს, რომელიც ახალციხის მუნიციპალიტეტს მოემსახურება.

„ნაგავმზიდი იმოძრავებს აწყურიდან ვალისა და ახალციხიდან ჭაჭარაქის მიმართულებით. მანქანა დაცლის ნაგვის ურნებს და შევა სოფლებშიც. იგეგმება ბულდოზერის შეძენაც, რომელიც თემის ტერიტორაზე გზებს გაასუფთავებს“, – ამბობს ზაზა მელიქიძე.

ცვლილებები შევიდა სახელმწიფო შესყიდვების 2014 წლის გეგმაშიც, რომელიც ასევე 2014 წლის ბიუჯეტში გაზრდილმა შემოსავლებმა გამოიწვია.

„ამინდებთან დაკავშირებით გაიზარდა თანხა საწვავის შესაძენად, რათა წლის ბოლომდე მოხდეს ახალციხის მუნიციპალიტეტის ტერიტორიაზე შიდა გზების გაწმენდა. ასევე იგეგმება ვიდეო რგოლის გადაღება, რომელიც მზადდება საახალწლოდ. ვიდეო რგოლის მომზადებაში მთელი რეგიონი ჩაერთვება“, – ამბობს ახალციხის მუნიციპალიტეტის გამგეობის შესყიდვების სამსახურის უფროსი ქეთევან ინასარიძე.

ცვლილებები შევიდა ახალციხის მუნიციპალიტეტის 2014 წლის ბიუჯეტიდან სოციალური დახმარების გაცემის წესში.

როგორც ახალციხის მუნიციპალიტეტის საკრებულოს თავმჯდომარის მოადგილე გელა ნოზაძე ამბობს, გამგეობა მედიკამენტებს ვეღარ დააფინანსებს, სანაცვლოდ გაიზარდა იმ ბავშვების დაფინანსება, რომლებიც სამხატვრო და სამუსიკო სკოლებში დადიან.

„სოციალური დახმარების წესში იყო მუხლი, რომელიც ითვალისწინებდა ყველა სახის სამედიცინო მომსახურებას. ამ მუხლს გამოეყო მედიკამენტების დაფინანსება, რადგან მათი შეძენა დიდ თანხებთან არის დაკავშირებული. სამაგიეროდ დავაფინანსებთ ახალციხის მუნიციპალიტეტის სოფლებში მცხოვრებ ბავშვებსაც, რომლებიც ახალციხეში სამხატრო ან სამუსიკო სკოლებში დადიან“, – ამბობს გელა ნოზაძე.

კიდევ ერთი ცვლილება „ახალციხის მუნიციპალიტეტში პრემიის ოდენობის განსაზღვრის წესს" ეხება.

„პირველ მიღებულ წესში პრემიები გაიცემოდა მხოლოდ მუნიციპალიტეტში დასაქმებულ საჯარო მოხელეებზე, ახლა თანამდებობები 4 კატეგორიად დაიყო; თანამდებობის პირები, სპეციალისტები, დამხმარე მუშაკები და ხელშეკრულებით აყვანილი თანამშრომლები, პრემიებს ოთხივე კატეგორიის თანამშრომლები მიიღებენ“, – ამბობს ნოზაძე.

[მანანა სარაშვილი, ახალციხე]