ახალციხის 2015 წლის ბიუჯეტში მე–9 ცვლილება შეიტანეს

დღეს, 16 დეკემბერს, ახალციხის მუნიციპალიტეტის საკრებულოს რიგგარეშე სხდომაზე ბიუჯეტში შესატანი ცვლილებები განიილეს.

ცვლილებების მიხედვით, ბიუჯეტის შემოსავლები გაიზარდა და 8.551.800–ის ნაცვლად 8.694.100 ლარი შეადგინა. მათ შორის, გადასახადები გაიზარდა 13.500 ლარით, სხვა შემოსავლები 77.200 ლარით. არაფინანსური აქტიების კლება გაიზარდა 52.600 ლარით.

შემოსავლების პარალელურად, გაიზარდა გადასახდელებიც და 10.943.200–ის ნაცვლად 11.086.000 ლარი შეადგინა.

გაზრდილ ხარჯებშია 15.500 ლარით გაზრდილი მერიის ხარჯი. მაგალითად, გაზრდილ ხარჯებშია ახალციხის სასპორტო სკოლისთვის რინგის შესაძენად გამოყოფილი 7200 ლარი, ასევე, ააიპ „ახალციხის“ტბის ნავის შესაძენად გათვალისწინებული 1200 ლარი და ახალციხის კულტურის დაწესებულებათა გაერთიანებისთვის წიგნების შესაძენად გათვლილი 900 ლარი.

თანხები იზრდება სახლების სახურავებისა და ფასადების შეცვლისა და სათნოების სახლის რებილიტაციისთვის. ეს თანხა 487.000–ის ნაცვლად 511.500 ლარით განისაზღვრა. 2500 ლარით გაიზარდა სამუსიკო სკოლის სუბსიდია და 63.300 ლარი გახდა.

ცვლილებები რელიგიური, საზოგადოებრივი და ახალგაზრდულ ორგანიზაციების ხელშეწყობის პროგრამაშიც შევიდა, – 110, 000 ლარი, 210, 000 ლარამდე გაიზარდა. ახალციხის მერის გიორგი კოპაძის განმარტებით, დამატებული 100, 000 ლარი , წმინდა შალვა ახალციხელის სახელობის ტაძრის სარემონტო–სამუშაოების დასრულებას მოხმარდება.

ასევე, 500 ლარით გაიზარდა თანხა სახელოვნებო სკოლის მოსწავლეთა სწავლის გადასახადის შეღავათებისთვის და 30.500 ლარი შეადგინა.

კიდვ ერთი ცვლილება მუნიციპალიტეტის საკრებულოს ხარჯებს შეეხო. კომპიუტერის შეძენის ნაცვლად 600 ლარით ფოტოაპარატს შეიძენენ.

[ვარლამ წიკლაური, ახალციხე]