ახალციხეში ადამიანის უფლებების შესახებ იმსჯელეს

შეხვედრას, რომელიც ასოციაცია „ლიბერალის“ დამფუძნებელმა გულო კოხოძემ გამართა, სამოქალაქო სექტორის, ადგილობრივი თვითმმართველობის, ასევე, სხვა საჯარო უწყებებისა და მედიის წარმომადგენლები ესწრებოდნენ.

„დღეს, შევიკრიბეთ იმისთვის, რომ ვთქვათ თუ რა ღირებულია ადამიანი, რა ღირებულია თითოეული ჩვენგანის უფლება, სად იწყება და სად მთავრდება ჩემი, შენი უფლებები. დღეს არა მხოლოდ ქალების, არამედ მამაკაცების, ბავშვების უფლებებიც ირღვევა. დღევანდელი დღე ჩვენი უფლებების შესახსენებლადაა“, - ამბობს კოხოძე.

შეხვედრაზე განსაკუთრებული ყურადღება აზერბაიჯანში დაკავებული ჟურნალისტის ხაჯიდა ისმაილოვას ისტორიას დაეთმო. ასევე, ისაუბრეს აზერბაიჯანში მედიის ლიკვიდაციისთვის შესახებ არსებულ კანონპროექტზეც.

„საინტერესო შეხვედრა იყო. გავეცანით ხაჯიდა ისმაილოვას ისტორიას. ასევე, საინტერესო იყო ის, რომ აზერბაიჯანში იგეგმება ისეთი კანონის მიღება, როგორიცაა მედიის ლიკვიდაცია. ეს შოკისმომგვრელია!“ - ამბობს პროფორიენტაციისა და კარიერის დაგეგმვის სპეციალისტი მზია მაისურაძე.

მისი თქმით, ხშირად ისე ვარღვევთ ერთმანეთის უფლებებს, რომ ამას ვერც ვაცნობიერებთ: „კარგი იქნება თუ ასეთი შეხვედრები ხშირად ჩატარდება და ხშირად შევახსენებთ ერთმანეთს იმის შესახებ, თუ როგორ უნდა დავიცვათ ადამიანის უფლებები“.

[თამუნა უჩიძე, ახალციხე]