'აუდი' – ახალგაზრდა უფლებადამცველები ახალციხეში

"აუდი" 12 ახალგაზრდისაგან შემდგარი ჯგუფია, რომლის მიზანიც სამცხე–ჯავახეთში და არა მარტო ამ რეგიონში მცხოვრები ადამიანების ღირსების შელახვის, უფლებებისა და თავისუფლებების დარღვევების გამოვლენა და დაცვა, ასევე საზოგადოების სამოქალაქო და სამართლებრივი ცნობიერების ამაღლებაა.

"სამწუხაროდ, ხშირად ირღვევა ადამიანის შრომის, სოციალური, საკუთრების, პირადი ცხოვრების ხელშეუხებლობის და სხვა უფლებები, რასაც როგორც წესი არ ახლავს ადეკვატური რეაგირება. ჩვენ გადავწყვიტეთ, რომ დავიცვათ მათი უფლებები და ამისთვის ჩამოვაყალიბეთ ეს ჯგუფი", – ამბობს "აუდის" წევრი ია დალალიშვილი.

ახალგაზრდა უფლებადამცველებმა ახალციხის მასშტაბით 100 მოქალაქე გამოკითხეს. მათ აინტერესებდათ იციან თუ არა ადამიანებმა საკუთარი უფლებების შესახებ და რამდენად ხშირად ირღვევა მათი უფლებები. როგორც აღმოჩნდა, 100 გამოკითხულიდან 82–ს მიაჩნია, რომ მათი უფლებები არ ირღვევა, უფრო მეტიც, არც არასდროს დარღვეულა. "აუდის" წევრები ამბობენ, რომ ეს გამოკითხვა გარკვეულწილად მიუთითებს, რომ ხშირად ადამიანებს არ აქვთ ინფორმაცია საკუთარი და ზოგადად ადამიანის უფლებების შესახებ.

ახალგაზრდა უფლებადამცველებთან კონსულტაცია უფასოა და ისინი ასოციაცია "ტოლერანტის" ოფისში იმუშავებენ.

"ძალიან მოტივირებული ადამიანები არიან და ჩვენ რაც შეგვიძლია დავეხმარებით. გაწერილი გვაქვს კალენდარული გეგმა, თუ რა ტრენინგები შეიძლება გაიარონ. ყველაზე მთავარია ისწავლონ როგორ დააკვირდნენ მოვლენებს და ამავე დროს მათ სურვილი აქვთ, რომ მოამზადონ ალტერნატიული ანგარიშები", – ამბობს ასოციაცია "ტოლერანტის" ხელმძღვანელი ცირა მესხიშვილი.



[თამარ თოთაძე, ახალციხე]