მესხეთში სახალხო დამცველის წარმომადგენლად გულო კოხოძე დაინიშნა

გულო კოხოძე ადამიანის უფლებების სავარაუდო დარღვევების ფაქტების შესახებ სახალხო დამცველის აპარატს რეგიონიდან ინფორმაციას მიაწვდის. შესაბამისად მისი სამოქმედო არეალი ახალციხის, ადიგენის, ასპინძისა და ბორჯომის მუნიციპალიტეტები იქნება.

ადამიანის უფლებების შესახებ საზოგადოებრივი ცნობიერების ამაღლების მიზნით იგი პერიოდულად სხვადასხვა ღონისძიებებს დაგეგმავს. პირველ ეტაპზე შეხვედრებს გამართავს ადგილობრივი თვითმმართველობის, რესურსცენტრების, საჯარო სკოლების, არასამთავრობო ორგანიზაციებისა და მედია საშუალებების წარმომადგენლებთან.

გულო კოხოძე პროფესიით ჟურნალისტია, მან ივანე ჯავახიშვილის სახელობის თბილისის სახელმწიფო უნივერსიტეტის ახალციხის ფილიალში ჟურნალისტიკის სპეციალობა დაამთავრა. კოხოძე სხვადასხვა დროს სხვადასხვა მედია საშუალებებში მუშაობდა: საზოგადოებრივ–შემოქმედებით ჟურნალ „კამერტონი“, რეგიონულ ტელეკომპანია „ლომსიაში“, „ადამიანის უფლებათა საინფორმაციო და სადოკუმენტაციო ცენტრის“ ინტერნეტ გაზეთში, გაზეთ „სამხრეთის კარიბჭეში“. ასევე იყო სამცხე–ჯავახეთის რეგიონული ასოციაცია „ტოლერანტის“ PR - მენეჯერი და ამავე ორგანიზაციაში გამომავალი სამენოვანი გაზეთის „ფესვების“ რედაქტორი; 2013 წლიდან დღემდე კი არის ასოციაცია „ლიბერალის“ დამფუძნებელი, პროექტის – „ტავრიელი დუხობორების დეპორტაცია საქართველოში და მათი იდენტობა“ ხელძღვანელი.

[თამუნა უჩიძე, ახალციხე]