ჯემალ პაქსაძე: 'არ იგეგმება მინარეთების დადგმა, ვიდრე არ შევუთანხმდებით სამუფთო სამმართველოს'

"მადლობა მინდა გადავუხადო ცენტრალურ ხელისუფლებას, განსაკუთრებით ბატონ ბიძინას, პრემიერ მინისტრს ირაკლი ღარიბაშვილს და ადიგენის საკრებულოს იმისთვის, რომ ეს პრობლემატური საკითხი კანონის ჩარჩოებში მოექცა", - ამბობს სრულიად საქართველოს მუფთი, რომელიც 28 ნოემბერს, ღამით, ჭელაში მინარეთის დაბრუნებას ესწრებოდა.

მისივე თქმით, სოფელში არავითარი დაპირისპირება არ იქნება: "ჩვენ ყველა ვართ ამ ქვეყნის შვილები, ერთი სისხლი და ხორცი, პატივს ვცემთ ქრისტიან მრევლს, ერთად ვცხოვრობთ, გვიმეზობლია, ერთმანეთთან დაახლოების სურვილი ყოველთვის გვქონია. ქართველები იმიტომ ვართ ძლიერები, რომ ერთმანეთის ჭირს და ვარამს ვიზიარებთ. სოფელში ცხოვრება ჩვეულებრივად გაგრძელდება".

ჯემალ პაქსაძე ამბობს, რომ მინარეთის ღამით დადგმა არ იყო პრევენცია, რკინის კონსტრუქციის აღმართვა დიდ დროს მოითხოვდა და სამუშაო დროში გაიწელა.

მისივე განცხადებით, მოსაზრება, რომ ჭელის შემდეგ მინარეთები სხვა მეჩეთებთანაც მალევე დაიდგმება, მცდარია: "კანონმდებლებთან ერთად ვმუშაობთ, რომ მოგვარდეს კანონით და ყველა მეჩეთი და სასწავლებელი დავარეგისტრიროთ. არ იგეგმება არავითარი მინარეთების დადგმა მანამდე, ვიდრე არ შევუთანხმდებით სამუფთო სამმართველოს მრევლის ოფიციალური წერილით".

რაც შეეხება კითხვას, ხომ არ აღავლინეს საზეიმო ლოცვა მინარეთის დაბრუნების შემდეგ, ჯემალ პაქსაძე გვპასუხობს: "არ სჭირდება ამას საზეიმო ლოცვა, ჩვენი გამარჯვება იქნება ტაო-კლარჯეთს, აფხაზეთს და ე.წ. სამხრეთ ოსეთს რომ დავიბრუნებთ. საზეიმო ლოცვას მაშინ ჩვენ და უწმინდესი ერთად აღვავლენთ".

მეჩეთთან სამუშაოები დასრულდა, ტერიტორია დატოვეს ადგილობრივმა მუსლიმებმა. მეჩეთში მხოლოდ რამდენიმე მათგანი იმყოფება.მეჩეთთან სანთლებითა და ხატებით ხელში რჩებიან სასულიერო პირები. პერიმეტრს კვლავ იცავენ სამართალდამცავები.

შეგახსენებთ, 27 ნოემბერს, გვიან ღამით, მას შემდეგ რაც ადიგენის საკრებულოსგან ნებართვა მიიღეს, ჭელაში მცხოვრებმა მუსლიმური თემის წარმომადგენლებმა, მოჭრილი და დასაწყობებული მინარეთის მეჩეთთან დაბრუნება დაიწყეს. წვიმის მიუხედავად, სამუშაოები გვიან ღამემდე გაგრძელდა. მინარეთის მონტაჟის დაწყებიდან მალევე მეჩეთთან გამოჩნდნენ სასულიერო პირები, რომლებიც აცხადებენ, რომ მინარეთის დადგმა შეცდომაა.

[sknews.ge]