ფრთხილად, შეიძლება ჩავარდეთ! [Photo]

მთავარი → საზოგადოება, ფოტოამბავი 20.11.2014

ხიდზე, რომლის გავლაც ყოველდღე ასობით ადამიანს უწევს, ფიცრებია ჩატეხილი და არ არის გამორიცხული ღამით, სიბნელეში, ვინმე დაზიანდეს.

ხიდი ახალციხეში, რუსთაველის ქუჩაზე, ასპინძის ქუჩის ჩასახვევთან მდებარეობს და ტროტურის ფუნქციასაც ასრულებს. ამ მონაკვეთის გავლა, მასზე გავლის გარეშე, შეუძლებელია. თვეებია ხიდი ამ მდგომარეობაშია, თუმცა, ამ დრომდე ყურადღება არავის მიუქცევია.

ქალაქ ახალციხის მერიაში განმარტავენ, რომ აღნიშნული პრობლემის შესახებ იციან. თუმცა, როდის შეაკეთებენ დაზიანებულ ხიდს ვერ აკონკრეტებენ.

"ერთ პროექტში გადის ამ ხიდთან მდებარე სახლის სახურავის გადახურვა, ასევე ვარძიის ჩიხში მდებარე ორსართულიანი სახლის სახურავისა და ხიდის რეაბილიტაცია. ეს პროექტი სატენდეროდ მომზადებულია, ამინდები ხელს არ უშლის ამ ხიდის გაკეთებას, როგორც კი ტენდერი დამთავრდება დაიწყება სამუშაოები", – ამბობს ქალაქის მერი გიორგი კოპაძე და ამატებს, რომ ბიუჯეტში ამისთვის თანხა გათვალისწინებული არ იყო, თუმცა ვინაიდან ხიდი ძალიან დაზიანებულია ბიუჯეტში გარკვეული ცვლილება შევიდა და აღნიშნული პროექტისთვის ჯამში დაახლოებით 80 ათასი ლარი გამოიყო.

[თამარ თოთაძე, ახალციხე]