"ახალციხის მელიორაციის" ყოფილ უფროსს ზურაბ ბაიდაურს ბრალი უკვე წაუყენეს. მას გამოძიება სსკ-ის 182 მუხლის პირველი და მესამე ნაწილში ედავება, რაც მითვისება-გაფლანგვას გულისხმობს და თავისუფლების აღკვეთას შვიდიდან 11 წლამდე ითვალისწინებს.
ზურაბ ბაიდაური ფინანსთა სამინისტროს საგამოძიებო სამსახურის თანამშრომლებმა გუშინ, 20 ნოემბერს, დაკითხვის შემდეგ
დააკავეს. ადვოკატის ირაკლი ბარძიმაძის განცხადებით, იგი უკანონო პატიმარია, რადგან მელიორაციის ყოფილი უფროსი სასამართლოს განჩინების გარეშე დააკავეს.
„ბაიდაურს უწყება გამომძიებელმა წინა დღეს, 19 ნოემბერს მიუტანა. მას თუ მიმალვა სურდა ამისთვის წინ მთელი ღამე ჰქონდა, მაგრამ პატიოსნად გამოცხადდა უწყებაში, გამოძიებასთან ითანამშრომლა და რაიმე დააშავა თუ არ დააშავა ყველაფერი თქვა. მიუხედავად ამისა, ის მაინც დააკავეს და სასამართლო განჩინების გარეშე“, - ამბობს ბარძიმაძე.
ბაიდაურს გამოძიება 33 070 ლარის მითვისებას ედავება. ფინანსთა სამინისტროს მიერ გავრცელებული ინფორმაციის თანახმად, მოსახლეობის მიერ გადახდილი სარწყავი წყლის საფასური მან ნაცვლად „ახალციხის მელიორაციის“ საბანკო ანგარიშისა თავად მიითვისა.
ირაკლი ბარძიმაძის თქმით, ბაიდაურზე სახელმწიფო უწყებების წარმომადგენლებისგან დიდი ზეწოლა ხორციელდება: „კონკრეტულად ვისი მხრიდან და რატომ ამაზე ჯერ საუბარი არ მინდა. მაგრამ იყო მკაცრი მოთხვონა, რომ სარწყავი სისტემები სწრაფად უნდა მოწესრიგებულიყო, იმიტომ რომ ხალხი უკმაყოფილო არ ყოფილიყო“.
ამიტომ, ადვოკატის განმარტებით, ბაიუდაური იძულებული გახდა კანონისთვის გადაეხვია და ვიდრე რწყვის სეზონი დასრულდებოდა ხალხში აკრეფილი თანხის ნაწილით მელიორაციის სისტემა მოეწესრიგებინა: „რამდენად არის დამნაშავე ბაიდაური გადაჭრით რამის თქმა შეუძლებელია, შესაძლოა იყოს დამნაშავე ან არა“.
ზურაბ ბაიდაურს „ახალციხის მელიორაციის“ დირექტორის თანამდებობაზე უფლება-მოსილება მიმდინარე წლის 20 აგვისტოს შეუწყდა.
„სამსახურში არ ცხადდებოდა, რამდენჯერმე წერილობით მივმართეთ ოჯახს, რომ სამსახურში გამოცხადებულიყო, მაგრამ აღმოჩნდა, რომ იგი თურქეთში იმყოფებოდა. ამიტომ მონიციპალიტეტის გამგეობაში მივიღეთ გადაწყვეტილება, რომ გაგვეთავისუფლებინა“, - ამბობს ახალციხის მუნიციპალიტეტის გამგებელი ზაზა მელიქიძე და ამატებს, რომ ბაიდაურის საქმესთან დაკავშირებით არაფერი იცის და ამის შესახებ „სამხრეთის კარიბჭესგან“ შეიტყო.
მელიქიძის განცხადებით, მას ბაიდაურთან არასდროს არანაირი შეხება არ ჰქონია: „მე რომ სამსახურში მოვედი ის აქ აღარ დამხვდა. მერე გაირკვა, რომ საქართველო ექვს ივნისს დაუტოვებია“.
გამოძიებამ დოკუმენტები მუნიციპალიტეტის გამგეობიდან სწორედ მას შემდეგ ამოიღო, რაც გამგებლად ზაზა მელიქიძე დაინიშნა: „ამ საქმესთან დაკავშირებით არავის დავუკითხივარ, თუმცა მივიღეთ სასამართლოს განჩინებით მოთხოვნა დოკუმენტების ამოღებასთან დაკავშირებით“.
ბაიდაურის საქმესთან დაკავშირებით, საქმის კურსში არც ყოფილი გამგებელი მალხაზ ჟუჟუნაძეა. იგი ამბობს, რომ მისი გამგებლობის პერიოდში ბაიდაური ჩვეულებრივ მუშაობდა, თუმცა, ამბობს, რომ მისი საქმიანობა საეჭვო იყო და ამიტომ ერთხელ თანხის ჩარიცხვაზე მას უარიც უთხრა.
„წერილობით მომმართა, რომ ბიუჯეტის თანხა ჩამერიცხა, მაგრამ იმის გამო, რომ მელიორაციის ანგარიშზე თანხა შემოტანილი არ ჰქონდა და მისი გაკეთებული არაფერი მინახავს, ეს გარემოება საეჭვოდ მომეჩვენა და ამიტომ თანხა არ ჩავურიცხე, - ამბობს ჟუჟუნაძე და ამატებს, რომ კონკრეტულად ის, თუ რისთვის სჭირდებოდა ბაიდაურს ეს თანხა არ ახსოვს - დაახლოებით ოთხი ათასი ლარი იყო და სავარაუდოდ ხელფასების გასაცემად ითხოვდა. მე რომ მისთვის თანხა ჩამერიცხა, მაშინ გამოდიოდა, რომ მას ბიუჯეტის თანხის მითვისებაში დავეხმარე“.
ბაიდაურის დაკავების შესახებ „სამხრეთის კარიბჭისგან“ შეიტყო ახალციხის მუნიციპალტიეტის საკრებულოს ყოფილმა თავმჯდომარემ ოლეგ სანდროშვილმა: „ჩემი მუშაობის პერიოდში გამოძიებას დოკუმენტები არ წაუღია. საქმის კურსში არ ვარ რის მითვისებას ედავებიან და რატომ. ბაიდაური სამსახურშიც ჩვეულებრივ დადიოდა და ამ მხრივ პრობლემა ნამდვილად არ ყოფილა“.
ადვოკატი აცხადებს, რომ მელიორაციის ყოფილი უფროსი ქვეყნიდან არც გაქცეულა და არც მიმალვა უცდია: „თანხა რომ მიეთვისებინა და გაქცეულიყო, უკან რატომ დაბრუნდებოდა?!“
რამდენიმე წუთში ზურაბ ბაიდაურის აღკვეთის ღონისძიების შეფარდებაზე სასამართლო იმსჯელებს. როგორც ადვოკატი აცხადებს, პროკურატურა სასამართლოში ბაიდაურისთვის აღკვეთის ღონისძიებად პატიმრობის შეფარდებას მოითხოვს.
[თამუნა უჩიძე, ახალციხე]