შპს 'ახალციხის მელიორაცია' ააიპ-ად გადაკეთდა

მელიორაციის სამსახურის უფროსი ზურაბ ბაიდაური

ახალციხის მუნიციპალიტეტის საკრებულომ აღნიშნული გადაწყვეტილება 14 თებერვალს გამართულ საკრებულოს რიგით მეორე სხდომაზე მიიღო. საკრებულოს თავმჯდომარის თქმით, აღნიშნული ცვლილების შედეგად საშუალება ექნებათ სარწყავი სისტემების მოწესრიგებისთვის თანხა ადგილობრივი ბიუჯეტიდან გამოყონ.

„მელიორაცია არამომგებიანი თემაა, ის უნდა იყოს დოტაციაზე და დაეხმაროს, რომ სოფლად აღდგეს სარწყავი სისტემები. შპს-ს შემთხვევაში შემოსავლები იბეგრებოდა და განვითარებისთვის არ ყოფნიდა. გარდა ამისა, ვერ ვეხმარებოდით ადგილობრივი ბიუჯეტიდან. უნდა გამოგვეცხადებინა ტენდერი, ვინც გაიმარჯვებდა, წყალსაქაჩის აღდგენა იმას უნდა განეხორციელებინა. ეს ისეთი საქმიანობაა, რომ სისტემას რომ აღადგენ, მას ყოველთვის სჭირდება შემდგომი მოვლა-პატრონობა“, - განმარტა ახალციხის მუნიციპალიტეტის საკრებულოს თავმჯდომარემ ოლეგ სანდროშვილმა და დასძინა, რომ ააიპ-ად ჩამოყალიბების შემდგომ ადგილობრივ ბიუჯეტიდან სუბსიდიის სახით გარკვეული თანხა გამოიყოფა.

თუმცა, რა თანხა იქნება გათვალისწინებული აღნიშნული სამსახურისთვის ადგილობრივ ბიუჯეტში , ჯერ ცნობილი არაა.

„ამ მიმართულებით შარშან 70 ათასი ლარი გავითვალისწინეთ, მაგრამ ვერ გამოვიყენეთ. სწორედ ამან გამოიწვია, რომ გადავაკეთეთ ააიპ-ად, მიიღებს ამ დაფინანსებას და მას ყველა წყალსაქაჩზე ეყოლება დარაჯი, რომელიც მთელი წლის განმავლობაში ყურადღებას მიაქცევს“, - აღნიშნა ოლეგ სანდროშვილმა.

შეგახსენებთ, რომ მელიორაციის სამსახურს 7 წყალსაქაჩის კონტროლი ევალება. მინაძეს, ჭაჭარაქის, წნისის, ვალეს, ნაოხრების, აბათხევისა და სხვილისის. „ახალციხის მელიორაციის“ სამსახური 2 წლის წინ ჩამოყალიბდა.

[თამარ თოთაძე, ახალციხე]