ახალციხეში, გვარამაძის ქუჩაზე, რეაბილიტირებული ხიდი გაიხსნა

გვარამაძის ქუჩაზე ხიდის რეაბილიტაცია დაახლოებით ორი თვის განმავლობაში მიმდინარეობდა. სამუშაოებისთვის თანხა ინფრასტრუქტურის სამინისტრომ გამოყო. სამუშაოები შპს „არალმა“ და ქვეკონტრაქტორმა ფირმამ, შპს „პეტამ“ შეასრულეს.

ხიდის გახსნისას ახალციხის მერს ადგილობრივებმა ქუჩაზე ნაგვის ურნების დადგმა სთხოვეს.

„მოაქვთ ნაგავი და აქ ყრიან, გარდა ამისა ნაგავი მოაქვთ ბაზრის მოვაჭრეებსაც“, – თქვა თეიმურაზ ბერიძემ.

ახალციხის მერმა განაცხადა, რომ გვარამაძეზე ურნების დადგმა იგეგმება:
„115.000 ლარად ნაგავმზიდი შევიძინეთ და სავარაუდოდ ხვალ ჩამოვა. ის 40 ურნა, რომელიც ჩვენ ვიყიდეთ, ამ უბანშიც დაიდგმება“.

დღესვე ქალაქის მერმა ზარზმელის ქუჩაზე მიმდინარე სამუშაოებიც მოინახულა.

[თინათინ ზაზაძე, ახალციხე]