ახალციხეში ინფრასტრუქტურული პროექტები ჯერ არ დაწყებულა

მიმდინარე წელს საქართველოს რეგიონული განვითარებისა და ინფრასტრუქტურის სამინისტრომ რეგიონში განსახორციელებელი პროექტების ფონდიდან ახალციხეში სამი პროექტი დააფინანსა.

ახალციხეში გვარამაძის ქუჩის გზის და სანიაღვრე არხის რეაბილიტაციისთვის 179,988.38 ლარი, ზარზმელის ქუჩის, ეგრეთ წოდებული "ადინაცატების" დასახლებაში გზის რეაბილიტაციისთვის და საკანალიზაციო ქსელის მოსაწყობად 17,659.59 ლარი, ასევე გვარამაძის ქუჩაზე მდებარე გადასასვლელი ხიდის რეაბილიტაციისთვის 3,362.16 ლარი გამოიყო. თუმცა, ჯერ არცერთი პროექტი არ დაწყებულა.

ქალაქ ახალციხის მუნიციპალიტეტის მერიაში განმარტავენ, რომ პროექტების განხორციელება ახალციხის მუნიციპალიტეტის ორად გაყოფის გამო დაგვიანდა.

"რაღაც გაურკვევლობა იყო ანგარიშებთან დაკავშირებით, ველოდებით ფულს, მოვა თუ არა მაშინვე დავდებთ ტენდერზე, ყველაფერი გამზადებული გვაქვს. ამის მერე 15 დღე უნდა ტენდერს და დაიწყება სამუშაოები", – ამბობს ქალაქის მერი გიორგი კოპაძე.
მისივე თქმით, სამუშაოები წლის ბოლომდე უნდა დასრულდეს.

[თამარ თოთაძე, ახალციხე]