მიწისძვრის იმიტაცია მეშვიდე სკოლაში

მეშვიდე საჯარო სკოლაში 29 აღსაზრდელია. სკოლაში დღეს, 18 ნოემბერს მიწისძვრის იმიტაცია მოაწყეს. ბავშვებმა და პედაგოგებმა ყველა ის მოქმედება შეასრულეს, რაც მიწისძვრის დროს შენობიდან უსაფრთხოდ გამოსასვლელად სჭირდებათ.

„ჩვენი სკოლა ჩართულია კატასტროფის რისკის ინკლუზიურ პროგრამაში, რომელსაც აფინანსებს ევროკომისია. მეორე წელია ამ პროგრამაში ვართ. შარშან გავიარეთ პირველადი სამედიცინო დახმარების კურსი, წელს კატასტროფის რისკების დროს რა უნდა გავაკეთოთ“, – ამბობს მეშვიდე საჯარო სკოლის დირექტორის მოადგილე დალი კრაველიძე.



იმიტირებული მიწისძვრის დროს სკოლაში სამაშველო სამსახურიც გამოიძახეს. მაშველებმა სკოლაში დარჩენილი ბავშვი შენობიდან გამოიყვანეს.

„ჩვენ დღეს ბავშვის გადარჩენის იმიტაცია განვახორციელეთ, რომელიც ოთახში იყო ჩაკეტილი და ვერ გამოდიოდა“, – ამბობს ახალციხის საგანგებო სიტუაციების სამსახურის ცვლის უფროსი მამუკა ზუმბაძე.

ღონისძიება პროექტ „კატასტროფების მიმართ მდგრადი და დაუცველი საზოგადოების ჩამოყალიბება სამხრეთ კავკასიაში, ბავშვებზე ორიენტირებული, ინკლუზიური კატასტროფების რისკის შემცირების საშუალებით“ ფარგლებში მოეწყო. აღნიშნული პროექტი ევროკომისიის ჰუმანიტარული მისიისა და სამოქალაქო თავდაცვის მიერ ფინანსდება და მას არასამთავრობო ორგანიზაცია „გადავარჩინოთ ბავშვები“ ახორციელებს. პროექტის ფარგლებში მეშვიდე საჯარო სკოლაში სამდღიანი ტრენინგი ტარდება, მიწისძვრის იმიტაცია ტრენინგების პრაქტიკული ნაწილი იყო.

ღონისძიებას ორგანიზაცია „გადავარჩინოთ ბაშვების“ წარმომადგენლები და სამცხე–ჯავახეთის გუბერნატორი აკაკი მაჭუტაძე ესწრებოდნენ.



[თამარ თოთაძე, ახალციხე]