კონკურსი ახალციხის სკოლებს შორის

ინტელექტუალური შეჯიბრი, რომელშიც ახალციხის საჯარო სკოლების მე-10 და მე-11 კლასის მოსწავლეები მონაწილეობდნენ, ახალციხის პირველ საჯარო სკოლაში, ახალციხის სამოქალაქო კლუბის ორგანიზებით გაიმართა.

ღონისძიება სამ რაუნდად ჩატარდა. კონკურსში ხუთი სკოლის გუნდი მონაწილეობდა, ჩართული იყო მეშვიდე საჯარო სკოლაც, რომელშიც შეზღუდული შესაძლებლობების მქონე ბავშვები სწავლობენ.

გამარჯვებული ჟიურიმ გამოავლინა, რომლის შემადგენლობაში იყვნენ ადგილობრივი თვითმმართველობის წარმომადგენელი, შსს ახალციხის რაიონული სამმართველოს უბნის ინსპექტორ-გამომძიებლები, სამაშველო სამსახურის წარმომადგენელი, ღია გარემოსდაცვითი სამოქალაქო ინიციატივის რეგიონის კოორდინატორი და არასამთავრობო ორგანიზაციის „ჰერა-21“-ის ხელმძღვანელი.

პირველი ადგილი პირველი საჯარო სკოლის გუნდმა მოიპოვა, მათ ერთი ქულით ჩამორჩა მეხუთე სკოლის გუნდი. გამარჯვებულ გუნდს სპეციალური პრიზები და სიგელები გადაეცა. სპეციალურად მათთვის მოეწყობა ექსკურსია ახალციხის სახანძრო-სამაშველო სამსახურში.

„საბოლოოდ, ძალიან კარგი ღონისძიება გამოვიდა, ყველაზე მნიშვნელოვანი ის იყო, რომ კონკურსში მონაწილოება მეშვიდე სკოლის მოსწავლეებმაც მიიღეს. მათ მიეწოდათ ინფორმაცია როგორ უნდა მოიქცნენ ბუნებრივი კატასტროფების დროს, ისინი ცოდნას მათივე სკოლის მოსწავლეებსაც გაუზიარებენ“,- ამბობს პირველი საჯარო სკოლის დირექტორი მაკა ჯანაშვილი.

კონკურსი სკოლებისთვის „კატასტროფის რისკის შემცირება-დიპეკო“ პროექტის ფარგლებში, გაეროს ბავშვთა ფონდისა და DRR-ს ცენტრის ორგანიზებით ჩატარდა.

მსგავსი სახის ღონისძიება გასულ წელსაც მოეწყო. მიმდინარე წლის 30 ოქტომბერს კი წიგნიერების დონის ამაღლების მიზნით, ინტელექტუალური თამაში „რა, სად, როდის“ ჩატარდება.

[თინათინ ზაზაძე, ახალციხე]