საქველმოქმედო აქცია სოციალურად დაუცველი ახალგაზრდებისთვის

საქველმოქმედო აქცია ახალციხის ჭიდაობის ფედერაციის ინიციატივითა და ქალაქ ახალციხის მერიის ორგანიზებით მიმდინარეობს. აქციის ფარგლებში ახალგაზრდები ოთხი დღის განმავლობაში სხვადასხვა სპორტულ–გამაჯანსაღებელ ღონისძიებებში მიიღებენ მონაწილეობას.

"ჩვენ ხელი უნდა შევუწყოთ ქართული ჭიდაობის პოპულარიზაციას და სპორტულ ღონისძიებებში ახალგაზრდების ჩართვას. ეს საქველმოქმედო აქციაც სწორედ ამას ემსახურება,რომლის ფარგლებში ახალგაზრდები ოთხი დღე სასტუმროში უფასოდ დაისვენებენ. დაგეგმილია შეხვედრები წარმატებულ სპორტსმენებთან, კულტურული და ისტორიული ტურები, ამასთანავე ეს ბავშვები ივლიან სამკურნალო აბაზანებზე, რომელიც სულ ახლახანს გაიხსნა", – ამბობს ახალციხის ჭიდაობის ფედერაციის პრეზიდენტი გოჩა პარუნაშვილი და ამატებს, რომ სამკურნალო აბაზანებზე ვიზიტი უფასოა ყველა სოციალურად დაუცველი და შეზღუდული შესაძლებლობის მქონე ბავშვისთვის.

აქციის ფარგლებში ახალგაზრდები უკვე შეხვდნენ ადგილობრივ მოჭიდავეს ბექა ბერძენიშვილს, რომელიც იაპონიაში მსოფლიო ჩემპიონატზე მიემგზავრება. ადგილობრივი სპორტსმენის იაპონიაში გამგზავრებას ქალაქის მერია აფინანსებს, რისთვისაც ადგილობრივი ბიუჯეტიდან 5 200 ლარი გამოიყო.

"მე მინდა, რომ ეს ბავშვები ჯანსაღი ცხოვრების სტილს მიყვებოდნენ და ყველა სპორტში იყვნენ ჩართული. ვფიქრობ, რომ ახალციხეში სპორტის ამ სახეობას მომავალი ნამდვილად აქვს და მიხარია, რომ ჭიდაობის ფედერაცია ჩამოყალიბდა", – ამბობს ადგილობრივი მოჭიდავე ბექა ბერძენიშვილი.

[თამარ თოთაძე, ახალციხე]