ახალციხეში ქართულ ჭიდაობაში ჩემპიონატი გაიხსნა

ქართული ჭიდაობის ჩემპიონატში მონაწილეობას დაახლოებით 200 მოჭიდავე იღებს. ისინი 2000–დან 2003 წლამდე დაბადებული ვაჟები არიან. შეჯიბრი 46–დან 81 წონით კატეგორიაში მიმდინარეობს.

ჩემპიონატი ახალციხეში ქართული ჭიდაობის სამცხე–ჯავახეთის ფედერაციის ორგანიზებითა და ახალციხის მერიისა და გუბერნიის ხელშეწყობით ტარდება. როგორც სამცხე–ჯავახეთის ფედერაციის პრეზიდენტი ქართულ ჭიდაობაში, გოჩა პარუნაშვილი განმარტავს, შეჯიბრი მიზნად, ახალგაზრდების სპორტის ამ სახეობით დაინტერესებასა და ახალციხეში ქართული ჭიდაობის ჯგუფების გახსნას ისახავს.

„ჯერ–ჯერობით ქართული ჭიდაობის ჯგუფები ახალციხეში არ არის. ამიტომ ჩემპიონატზე მხოლოდ რამდენიმე მონაწილე ჭიდაობს. ეს არის არასაკმარისი, თუმცა ეს არის ჩვენი პირველი ნაბიჯები, რადგან სამცხე–ჯავახეთის ჭიდაობის ფედერაცია მხოლოდ ერთი წლის წინ ჩამოყალიბდა“ – განმარტა გოჩა პარუნაშვილმა.

ჭიდაობის ჩემპიონატი ორ დღიანია და ხვალ, 26 მარტს დასრულდება. ფინალურ შეხვედრებში გამოვლინდებიან გამარჯვებულები და მათ სამახსოვრო მედლები გადაეცემათ.

[თაკო ფეიქრიშვილი, ახალციხე]