საყოფაცხოვრებო ნარჩენებით შექმნილი ნამუშევრების გამოფენა

გამოფენის მონაწილეები ამბობენ, რომ ახალი ნამუშევრების შესაქმნელად ძირითადად მეორადი ნივთები გამოიყენეს, როგორიცაა: პოლიეთილენის ბოთლები, ნაჭრები, გაწყვეტილი სამკაულები და ა.შ.

სამხატვრო სკოლაში გამოფენის იდეა ახალციხის მუნიციპალიტეტის კულტურის სამსახურს ეკუთვნის. სამსახურის უფროსის მაია სხრიტლაძის განმარტებით, გამოფენის მოწყობა მას შემდეგ გადაწყვიტეს, რაც გურკელის საჯარო სკოლაში, 24 ოქტომბერს გამართულ საღამოზე „ხელოვნებაა თავად უკვდავება“ მიიწვიეს.

„ჩვენ არ ვაბინძურებთ გარემოს და სხვადასხვა ნარჩენებით, რომელიც გამოსაყენებლად უვარგისია, ვამზადებთ ნამუშევრებს. აქ 100–მდე ნამუშევარია წარმოდგენილი. მოსწავლეები ამისთვის სამი თვის განმავლობაში ემზადებოდნენ“, – ამბობს გურკელის საჯარო სკოლის ხელოვნების პედაგოგი ნათია ზაზაძე.

მისივე თქმით, მსგავი გამოფენა და ყურადღება მეტი სტიმულის მიმცემია მოსწავლეებისთვის.

ნამუშევრის ავტორები ახალციხის მუნიციპალიტეტის კულტურის სამსახურმა სიგელებითა და საჩუქრებით დააჯილდოვა.

„გურკელის სკოლის მოასწავლეებმა წარმოადგინეს ძალიან განსხვავებული სტილი. ეს არის მათი პედაგოგების დაუღალავი შრომის შედეგი. ყველა ნამუშევარი ჩამოყალიბებული სპეციალისტის ნამუშევრების შთაბეჭდილებას ტოვებს“, – განაცხადა ახალციხის მუნიციპალიტეტის კულტურის სამსახურის, კულტურისა და განათლების განყოფილების გამგემ რეზო ადნღულაძემ.

დღესვე სიმბოლური საჩუქრებით დაჯილდოვდნენ კონკურსის „მესხეთი ჩვენი სიყვარული“ გამარჯვებულები.

მესხეთის თემატიკაზე გამოცხადებულ ხატვის კონკურსში მონაწილეობა ახალციხის მუნიციპალიტეტის მასშტაბით 12 სკოლის მეხუთედან – მეთორმეტე კლასის ჩათვლით მოსწავლეებმა მიიღეს.

სამ–სამი გამარჯვებული გამოვლინდა მეხუთედან მეშვიდე კლასის ჩათვლით და მერვედან მეთორმეტე კლასის ჩათვლით.
ხატვის კონკურსში 17 მოსწავლე მონაწილეობდა. ჩვიდმეტივეს საჩუქრები გადაეცა. გამარჯვებულებს კი საჩუქრებთან ერთად სიგელებიც.

ორივე ღონისძიებისთვის ახალციხის კულტურის სამსახურმა 270 ლარი გამოყო.

ღონისძიებას ახალციხის კულტურის სამსახურის თანამშრომლები, გამგეობის წარმომადგენლები და რესურსცენტრის ხელმძღვანელი, ხათუნა ხმალაძე ესწრებოდნენ.







[თინათინ ზაზაძე, ახალციხე]