რეგიონებში იურიდიული დახმარების ქსელი იქმნება

შეხვედრა სამოქალაქო განვითარების სააგენტოს (CiDA) ორგანიზებით იურიდიული დახმარების სამსახურის სამცხე-ჯავახეთის ბიუროში შედგა.

დისკუსიას იმ არასამთავრობო ორგანიზაციების წარმომადგენლები ესწრებოდნენ, რომლებიც მუნიციპალიტეტის მასშტაბით უფასო იურიდიულ კონსულტაციებზე მუშაობენ.

მონაწილეებმა ისაუბრეს, იმაზე თუ რამდენად მნიშვნელოვანია სოციალურად დაუცველი მოსახლეობისთვის უფასო იურიდიული დახმარებების გაწევა და რა სახის კონსულტაციებს უწევენ ადამიანებს ამ კუთხით მომუშავე არასამთავრობო ორგანიზაციები.

შეხვედრაზე ასევე იმსჯელეს იმის შესახებ, როგორ უნდა ითანამშრომლონ სახელმწიფო და არასამთავრობო ორგანიზაციების წარმომადგენლებმა გაცილებით ეფექტური შედეგის მისაღებად.

”თანამშრომლობა ხელს შეუწყობს სახელმწიფოს მიერ დაფინანსებული უფასო იურიდიული დახმარების სისტემისა და არასამთავრობო სექტორში არსებული იურიდიული საქმინობის განმახორციელებელი ორგანიზაციებისათვის გამოცდილებების გაცვლას”, - განმარტავს იურიდიული დახმარების სამსახურის დირექტორი ირაკლი კობიძე და ამატებს, რომ იმ შემთხვევაში თუკი, რომელიმე ორგანიზაციას არ აქვს თავის მანდატში კონკრეტული მომსახურება, რომელსაც კონკრეტული ადამიანი საჭიროებს, ერთმანეთს შორის გადამისამართება უნდა მოხდეს, - რადგან საბოლოო ჯამში არცერთი სოციალურად დაუცველი ადამიანი არ დარჩეს უფასო იურიდიული დახმარების გარეშე”.

იურიდიული დახმარების სამსახური საქართველოს მასშტაბით ყოველწლიურად დაახლოებით 25 ათასამდე ადამიანს უწევს უფასო კონსულტაციას.

ირაკლი კობიძის თქმით, მსგავსი შეხვედრები საქართველოს ცალკეულ რეგიონებში უკვე ჩატარდა და სამომავლოდ დასავლეთ საქართველოშიც იგეგმება.

სამოქალაქო განვითარების სააგენტო (CiDA) რეგიონებში იურიდიული დახმარების ქსელს აშშ-ს საერთაშორისო განვითარების სააგენტოს (USAID) მხარდაჭერით ქმნის.

სტატია დაფინანსებულია ევრაზიის თანამშრომლობის ფონდის მიერ „სამოქალაქო ინიციატივა დამოუკიდებელი მართლმსაჯულებისთვის“ პროექტის ფარგლებში, ამერიკის შეერთებული შტატების საერთაშორისო განვითარების სააგენტოს (USAID), აღმოსავლეთ- დასავლეთის მართვის ინსტიტუტისა (EWMI), და შვედეთის განვითარების სააგენტოს (Sida) მეშვეობით. შინაარსზე პასუხისმგებელია სამოქალაქო განვითარების სააგენტო (CiDA) და შესაძლებელია, შეხედულებები არ ემთხვეოდეს ევრაზიის თანამშრომლობის ფონდის, USAID-ის, ამერიკის მთავრობის ან აღმოსავლეთ-დასავლეთ მართვის ინსტიტუტის (EWMI) შეხედულებებს. სტატია მომზადებულია პროექტის „სისხლის სამართლის რეფორმების იმპლემენტაციის სტრატეგიის მონიტორინგი და ანალიზი უფასო იურიდიული დახმარების სფეროში“ ფარგლებში, რომელიც ხორციელდება სამოქალაქო განვითარების სააგენტოს (CiDA) მიერ.

[თამუნა უჩიძე, ახალციხე]