სამცხე–ჯავახეთში საკონსულტაციო საბჭო შეიქმნა

ახლადშექმნილი ორგანო მხარის სტრატეგიულ მიზნებსა და სამოქმედო გეგმებთან დაკავშირებულ დოკუმენტებზე იმუშავებს. უკვე დამტკიცდა საბჭოს დებულება და ჩამოყალიბდა სამუშაო ჯგუფები, რომლებიც იმუშავებენ მუნიციპალიტეტებში ინფრასტრუქტურის განვითარების, ბიზნესისა და სოფლის მეურნეობის ხელშეწყობის, ჯანდაცვისა და სოციალური განვითარების, განათლებისა და კულტურის, ასევე გარემოს დაცვის კუთხით.

საკონსულტაციო საბჭოს წევრები შვიდივე მუნიციპალიტეტის გამგებლები (მერი), საკრებულოს თავმჯდომარეები და თავმჯდომარეების მოადგილეები იქნებიან.

ახლადშექმნილი საკონსულტაციო საბჭოს სხდომას რეგიონული განვითარებისა და ინფრასტრუქტურის სამინისტროს, რეგიონული პოლიტიკის დეპარტამენტის უფროსი გიორგი წაქაძე ესწრებოდა.

„სამუშაო ჯგუფები იმუშავებენ სამოქმედო გეგმაზე. სამოქმედო გეგმა კი საფუძვლად დაედება მომავალი სამი წლის განმავლობაში თითოეული მუნიციპალიტეტის და მთლიანი მხარის სტრატეგიული მიზნების მიღწევას“, – განაცხადა გიორგი წაქაძემ.

საკონსულტაციო საბჭოს პირველი სამუშაო შეხვედრა ხვალ, 16 ოქტომბერსაა ჩანიშნული.

„სამუშაო ჯგუფები შეიკრიბებიან პერიოდულად. საბჭო განიხილავს რაიონებში დასაგეგმ პროექტებს და შემდგომ გადაწყდება რომელ მუნიციპალიტეტში რა პროექტი დაფინანსდება“, – ამბობს სამცხე–ჯავახეთის გუბერნატორი, საკონსულტაციო საბჭოს ხელმძღვანელი აკაკი მაჭუტაძე.

მსგავსი სახის საკონსულტაციო საბჭოები ყველა რეგიონში იქმნება.

[თინათინ ზაზაძე, ახალციხე]