ახალციხის თვითმმართველობაში საკონკურსო კომისიას ქალაქის მერი უხელმძღვანელებს

ქალაქ ახალციხის მუნიციპალიტეტის მერიაში საჯარო მოხელეთა შესარჩევი კონკურსი ოქტომბრის ბოლოს ჩატარდება. გარდა იმ თანამდებობისა, რომელსაც ქალაქის არჩეული მერი ნიშნავს, კონკურსს ყველა საჯარო მოხელე გაივლის. ამ საკითხებზე დღეს, 18 სექტემბერს საკრებულოს სხდომაზე იმსჯელეს.

„კონკურსი შედგება სამი ეტაპისგან: საბუთების გადარჩევა, ტესტირება და გასაუბრება. პირველ და მესამე ეტაპს ჩაატარებს ჩვენს მიერ შექმნილი საკონკურსო–საატესტაციო კომისია, ხოლო ტესტირებას ჩაატარებს ორი უწყებისგან ერთ–ერთი. ან იუსტიციის სასწავლო ცენტრი, ან ეროვნული საგამოცდო ცენტრი“, – განმარტავს ქალაქ ახალციხის საკრებულოს თავმჯდომარე კახა ბერიძე.

ტესტირება ელექტრონული ფორმით ჩატარდება.

„ჩვენ გვქონდა უფლება, რომ დაგვეწესებინა ის მინიმალური ზღვარი, რომელიც კონკურსანტმა უნდა გადალახოს. იყო რეკომენდაცია 50–დან 75 პროცენტამდე, ჩვენ გადავწყვიტეთ 55 პროცენტიანი ბარიერი. ანუ 60 კითხვიდან სწორი პასუხი 33 კითხვას მაინც უნდა გაეცეს“, – ამბობს საკრებულოს თავმდჯომარე.



დღევანდელ სხდომაზე აირჩიეს საკონკურსო საატესტაციო კომისიის თავმჯდომარეც. როგორც ქალაქის თვითმმართველობაში განმარტავენ, კანონის თანამხმად კომისიის თავმჯდომარე დაწესებულების ხელმძღვანელი ან მისი მოადგილე უნდა იყოს. ამიტომ, საკონკურსო–საატესტაციო კომისიის თავმჯდომარედ ქალაქის მერი გიორგი კოპაძე დაასახელეს. ფარული კენჭისყრის შედეგად აღმოჩნდა, რომ საკრებულოს სხდომაზე დამსწრე 14 დეპუტატიდან გიორგი კოპაძის კანდიდატურას მხარი 10–მა დეპუტატმა დაუჭირა.

„კომისიის თავმჯდომარედ ქალაქის მერი აირჩიეს, იგივე მოხდება ამ კონკურსზე, რაც წინა კონკურსის დროს მოხდა, ვისაც უნდათ დატოვებენ, ვისაც უნდა გაუშვებენ. ეს ყველაფერი არის მხოლოდ ხალხის თვალის ასახვევად და მოსატყუებლად“, – ამბობს ქალაქ ახალციხის საკრებულოს დეპუტატი „ნინო ბურჯანაძე – ერთიანი ოპოზიციიდან“ ჯიმშერ გოგოლაური.



[თამარ თოთაძე, ახალციხე]