რა შემთხვევაში დააფინანსებს სახელმწიფო მცირე მეწარმეებს

მცირე მეწარმეების ხელშეწყობისთვის საქართველოს ყველა რეგიონში ახალი სახელმწიფო პროგრამა იწყება, რომლისთვისაც 20 მილიონი ლარი დაიხარჯება, აქედან, 4 მილიონ 380 ათასი ლარი სამცხე–ჯავახეთისა და ქვემო–ქართლისთვისაა გამოყოფილი.
პროგრამაში ჩართვის მსურველებმა უნდა შეადგინონ ბიზნეს გეგმა, კარგი ბიზნეს გეგმის შემთხვევაში მათ სახელმწიფო მაქსიმუმ 5 ათასი ლარით დააფინანსებს. თუმცა, აუცილებელია, რომ მეწარმეს საწყისი კაპიტალის სახით პირად ანგარიშზე 1 000 ლარი ჰქონდეს.

„ასევე, შესაძლებელია გაერთიანდეს ორი ან სამი ადამიანი და საკუთარი ბიზნესის განვითარებისთვის 10 ან 15 ათას ლარიანი დაფინანსება მიიღონ. ეს პროექტი ძალიან მნიშვნელოვანია იმ ადამიანებისთვის, რომლებიც მცირე ბიზნესს ეწევიან. გარდა ამისა, პროექტი იმ პირებისთვისაც იქნება, ვისაც ბიზნესის დაწყების სურვილი აქვს“, – განმარტავს ახალციხის ვიცე მერი ზაზა თამარაშვილი.

აღნიშნულ პროგრამას საქართველოს ეკონომიკისა და მდგრადი განვითარების სამინისტრო შუალედური ორგანიზაციების საშუალებით განახორციელებს.

„სამინისტრო აცხადებს კონკურსს იმ ორგანიზაციებისთვის, ვინც მონაწილეობას მიიღებს ამ პროექტში. რეგიონის მასშტაბით შერჩეული ორგანიზაციები განახორციელებენ ამ პროექტს. არამხოლოდ სამთავრობო სტრუქტურები შეისწავლიან ბიზნეს გეგმებს, არამედ სწორედ ის ორგანიზაციები, რომლებიც სამინისტროს მიერ შეირჩევიან“, – ამბობს ზაზა თამარაშვილი.

პროგრამის პრეზენტაცია, რომელსაც მცირე მეწარმეები ესწრებოდნენ, ახალციხეში დღეს, 18 სექტემბერს გაიმართა.

„15 წლიანი გამოცდილება მაქვს, საქმიანობა კრედიტით დავიწყე და დღესაც ასე ვაგრძელებ. დღეს თუ გვექნება საშუალება, რომ ბონუსის სახით გარკვეული თანხა მივიღო, მაქვს გეგმა, რომელიც შემიძლია განვახორციელო“, – ამბობს მცირე მეწარმე ნანა გიგუაშვილი და ამატებს, რომ საწყის ეტაპზე პროგრამის ფარგლებში გათვალისწინებული თანხა საკმარისია.

მცირე მეწარმეების ხელშემწყობი პროექტი 10 ოქტომბრიდან იწყება და 26 თვეს მოიცავს.



[თამარ თოთაძე, ახალციხე]