ნაფიც მსაჯულთა სასამართლოზე მკვლელობაში ბრალდებული საჯარო მოხელე დაკითხეს

ნაფიცი მსაჯულების მონაწილეობით თბილისის საქალაქო სასამართლოში საქმის არსებითი განხილვა დაიწყო. ნაფიცი მსაჯულები ახალციხის მუნიციპალიტეტის სოფელ ნაოხრებში 80 წლამდე ასაკის ანა ბაბოევის მკვლელობაში ბრალდებული ს.ბ-ს საქმეს განიხილავენ.

ს.ბ-თან ერთად ნაფიც მსაჯულებს ამავე დანაშაულში ბრალდებული საჯარო მოხელის მარინე სიმონიანის საქმეც უნდა განეხილათ, თუმცა სიმონიანმა ბრალი აღიარა და პროკურატურასთან საპროცესო გარიგება გააფორმა. ამიტომ სიმონიანის საქმე მასთან ერთად ბრალდებულის ს.ბ-ს საქმეს გამოეყო და მას ახალციხის რაიონულმა სასამართლომ თავისუფლების აღკვეთა 7 წლით შეუფარდა.

მარინე სიმონიანმა ნაფიც მსაჯულთა სასამართლოზე დაკითხვისას განაცხადა, რომ ს.ბ-მ მკვლელობა მასთან ერთად ჩაიდინა.

„აღიარა და თქვა, რომ დამნაშავე ვარ და ერთად ჩავიდინეთ დანაშაულიო, მაგრამ რამდენად სწორად თქვა ეგ სხვა საკითხია, - ამბობს ს.ბ-ს ადვოკატი ირაკლი ბარძიმაძე და ამატებს, რომ სიმონიანმა ბრალი იმიტომ აღიარა, რომ მას საპროცესო გარიგება გაუფორმეს - თქვა სამუდამო პატიმრობა ჩემთვის სიკვდილის ტოლპაფასია, ერთი ციხეში გატარებული დღე ჩემთვის ერთი წელია, რადგან შვილებს და ოჯახს მოშორებული ვარო“.

გარდა მარინე სიმონიანისა ნაფიც საჯულთა სასამართლოზე დაიკითხა ამავე მკვლელობაში ბრალდებული მ.ს-ც. თავდაპირველად იგი სიმონიანთან და ს.ბ-თან ერთად მისცეს პასუხისგებაში, თუმცა მოგვიანებით, ვიდრე საქმე ნაფიც მსაჯულთა სასამართლოს გადაეცემოდა, მისი საქმე მკვლელობაში ბრლადებულთა საქმეს გამოეყო.

ნაფიც მსაჯულთა სასამართლოზე დაკითხივსას მან, ისევე როგორც მარინე სიმონიანმა განაცხადა, რომ მკვლელობა ს.ბ-მ ჩაიდინა.

„ორი ადამიანი ადებს ხელს ს.ბ-ს. შექმნილ ვითარებაში ნაფიცი მსაჯულები მხოლოდ კანონიერი ქურდები უნდა იყვნენ, რომ ბრლადებული გაამართლონ“, - აცხადებს სამარჯიშვილი.

თბილისის საქალაქო სასამართლოში ბრალდების მხარის მოწმეების დაკითხვა ჯერ ისევ გრძელდება. ამ დრომდე მხოლოდ ხუთი სხდომა გაიმართა.
შეგახსენებთ, რომ გარდაცვლილი ბაბოევი სამართალდამცავებმა 16 თებერვალს საკუთარ ბინაში იპოვეს. 17 თებერვალს კი მარინე სიმონიანი, ს.ბ. და მ.ს. დააკავეს. მომხდარზე ძიება სსკ-ის 109-ე მუხლის მე-2 ნაწილით (განზრახ მკვლელობა დამამძიმებელ გარემოებებში ჩადენილი ჯგუფურად) და 177-ე მუხლის მესამე ნაწილით (ჯგუფური ქურდობა) დაიწყო.

[თამუნა უჩიძე, ახალციხე]