პირველი საქმე სამცხე-ჯავახეთიდან, რომელსაც, სავარაუდოდ, ნაფიცი მსაჯულები განიხილავენ

ახალციხის მუნიციპალიტეტის სოფელ ნაოხრებში 80 წლამდე ასაკის ანა ბაბოევის მკვლელობისა და ძარცვისთვის ბრალდებულების საქმის ნაფიც მსაჯულთა სასამართლოსთვის გადაცემის საკითხი 19 მაისს გაირკვევა.

1970 წელს დაბადებულ მარინე სიმონიანისა და 1951 წელს დაბადებული ს.ბ-ს ბრალი ედებათ სსკ-ის 109-ე მუხლის მეორე ნაწილითა ( განზრახ მკვლელობა დამამძიმებელ გარემოებებში ჩადენილი ჯგუფურად) და 177-ე მუხლის მესამე ნაწილით (ჯგუფური ქურდობა). 109-ე მუხლი ითვალისწინებს თავისუფლების აღკვეთას16-დან 20-წლამდე, ან უვადოდ, 177-ე მუხლი კი 4-დან 5 წლამდე ზღუდავს თავისუფლებას.

მარინე სიმონიანის ერთ-ერთი ადვოკატის, ნუგზარ სამარჯიშვილის განმარტებით, რადგან სიმონიანი დაკავებისას საჯარო მოხელე იყო და მისთვის წაყენებული მუხლი უვადო პატიმრობას ითვალისწინებს, საქმე ნაფიც მსაჯულთა სასამართლოს ქვემდებარეა.

„მოსამართლე თავად არკვევს ასეთ შემთხვევაში, სურთ თუ არა მხარეებს, რომ საქმე ნაფიცმა მსაჯულებმა განიხილონ. დაცვის მხარე უკვე შეთანხმებული ვართ, რომ საქმის ნაფიც მსაჯულთა სასამართლოსთვის გადაცემა მოვითხოვოთ“, - აცხადებს ს.ბ-ს ადვოკატი ირაკლი ბარძიმაძე.

მისი თქმით, ნაფიც მსაჯუთლა სასამართლოზე მეტი შანსია იმის, რომ თავიანთი სიმართლე დაამტკიცონ: „ჩვენი აზრით, საქმეში ბევრი უზუსტობაა და მტკიცებულებებიც პროცესუალური ნორმების დარღვევითაა მოპოვებული“.

პროკურორის, მამუკა ქომოშვილის განმარტებით, საპროცესო კანონდებლობის თანახმად, თუ მხარე მოითხოვს რომ საქმე ნაფიც მსაჯულთა სასამართლომ განიხილოს, მოსამართლე ამაზე უარს ვერ იტყვის, იმ შემთხვევაშიც კი თუ ბრალდების მხარე წინააღდეგი იქნება.

ამ დრომდე სამცხე-ჯავახეთიდან ნაფიც მსაჯულთა სასამართლოს განსახილველად არცერთი საქმე არ გადასცემია. ანა ბაბოევის მკვლელობაში ბრალდებულების საქმე რეგიონიდან პირველი იქნება.

[თამუნა უჩიძე, ახალციხე]