მკვლელობაში ბრალდებული საჯარო მოხელის საქმეს ნაფიცი მსაჯულები განიხილავენ

დღეს, 19 მაისს, მარინე სიმონიანისა და მასთან ერთად ბრალდებული ს.ბ-ს საქმე, განსახილველად თბილისის საქალაქო სასამართლოში ნაფიც მსაჯულებს გადაეცათ. ამის შესახებ ახალციხის რაიონული სასამართლოს მოსამართლემ მარიკა ჩიტაშვილმა მხარეებთან ერთად დღეს გამართულ წინა სასამართლო პროცესზე იმსჯელა. ორივე ბრალდებულმა საქმის ნაფიც მსაჯულთა სასამართლოსთვის გადაცემაზე თანხმობა განაცხადა. აღნიშნულის შესახებ საწინააღმდეგო პოზიცია დააფიქსირა პროკურორმა.

„ბრალდების მხარე წინააღმდეგია, რომ საქმე ნაფიცმა მსაჯულებმა განიხილონ“, - განაცხადა პროკურორმა მამუკა ქომოშვილმა.

თუმცა, როგორც მოსამართლემ მარიკა ჩიტაშვილმა განმარტა, ასეთ შემთხვევაში საქმეს სასამართლო ბრალდებულების სურვილის მიხედვით წყვეტს, ანუ უარიც და თანხმობაც, იმის შესახებ განიხილავენ თუ არა საქმეს ნაფიცი მსაჯულები, მხოლოდ ბრალდებულების გადასაწყვეტია. ამიტომ, მან ნაფიც მსაჯულთა შესარჩევი სხდომა, თბილისის საქალაქო სასამართლოში, 9 ივნისს 10 საათზე ჩანიშნა.

„სამოქალაქო რეესტრიდან 100 მოქალაქეს, რომელიც 18 წლის ზევითაა, კომპიუტერული წესით ამოიღებენ. მათ სასამართლოში დაიბარებენ და 9 ივნისს შერჩევა დაიწყება“, - აცხადებს ბრალდებულთა ერთ-ერთი ადვოკატი ირაკლი ბარძიმაძე და ამატებს, რომ ნაფიც მსაჯულთა სასამართლოს შემთხვევაში, სიმართლის დადგენის მეტი შანსია.

სამცხე-ჯავახეთიდან ნაფიც მსაჯულთა სასამართლოს საქმე პირველად გადაეცა.

შეგახსენებთ, გარდაცვლილი ბაბოევი სამართალდამცავებმა 16 თებერვალს საკუთარ ბინაში იპოვეს. 17 თებერვლას კი მარინე სიმონიანი, ს.ბ. და მ.ს. დააკავეს. მომხადარზე ძიება სსკ-ის 109-ე მუხლის მე-2 ნაწილით (განზრახ მკვლელობა დამამძიმებელ გარემოებებში ჩადენილი ჯგუფურად) და 177-ე მუხლის მესამე ნაწილით (ჯგუფური ქურდობა) დაიწყო.

[თამუნა უჩიძე, ახალციხე]