ახალციხის ციხეში ვიზიტორების რაოდენობამ იკლო

გახსნის შემდეგ, ახალციხის ციხეს დღეში სამიდან ოთხი ათასამდე ვიზიტორი სტუმრობდა. ამ ეტაპზე კი ტურისტთა რაოდენობა დღის განმავლობაში 50-დან 130-მდე მერყეობს.

როგორც ციხის საზოგადოებასთან ურთიერთობის სამსახურის უფროსი ლილი გოზალიშვილი ამბობს, ვიზიტორები დეკემბრის დასაწყისშიც საკმაოდ ბევრი ჰყავდათ, დღეში დაახლოებით 400-500: ”ამ ეტაპისთვის ტურისტები მცირე რაოდენობით, თუმცა მაინც შემოდიან. ძირითადად: რუსეთიდან, უკრაინიდან, ლიტვიდან, ლატვიიდან, ესტონეთიდან, ისრაელიდან და გერმანიიდან”.

ადმინისტრაციაში ამბობენ, რომ საქართველოს ტურისტულ ადგილებს შორის ვიზიტორთა რაოდენობით ახალციხის ციხე ლიდერია.

”ჩვენთან ტურისტული სააგენტოს დეპარტამენტის სხდომა ჩატარდა და როდესაც ნახეს ჩვენი მონაცემები, გაოგნებულები დარჩნენ. ამდენი ვიზიტორი არავის ჰყავს”, - ამბობს გოზალიშვილი.

ახალციხის ციხეს გახსნის დღიდან, 16 აგვისტოდან, დღემდე 120 ათასამდე ვიზიტორმა მოინახულა, აქედან 20 ათასმა ციხე უფასოდ დაათვალიერა. ამას გარდა, 16 აგვისტოს, გახსნის დღეს, ციხეს 50 ათასი ვიზიტორი ესტუმრა.

”ციხე უფასოდ დაათვალიერეს სოციალურად დაუცველებმა, იძულებით გადაადგილებულმა და შეზღუდული შესაძლებლობების მქონე პირებმა”,-განმარტავს გოზალიშვილი.

შეგახსენებთ, რომ პირველი ნოემბრის შემდეგ ზედა ციხის დათვალიერება ყველასთვის ფასიანი გახდა. ციხეში შესვლა მოზრდილებისთვის ხუთი ლარი, სტუდენტებისთვის - 1,50 ლარი, მოსწავლეებისთვის კი ერთი ლარია.

ციხეს 14 გიდი ემსახურება. ქართულენოვანი გიდი ათი ლარი ღირს, უცხოენოვანი (რუსული, ინგლისური, თურქული) კი 20 ლარი.

[თინათინ ზაზაძე, ახალციხე]