ახალციხის ციხეში ვიზიტორების რაოდენობამ იმატა

ახალციხის ციხის ადმინისტრაციაში განმარტავენ, რომ ვიზიტორთა რაოდენობამ განსაკუთრებით აპრილის თვიდან იმატა. თუმცა, ციხეს დამთვალიერებელი არც ზამთრის თვეებში აკლდა.

”იანვარში, თებერვალსა და მარტში, ციხეს 1500-დან 1700-მდე ვიზიტორი სტუმრობდა. აპრილის თვეში 4500 დამთვალიერებელი იყო. მაისის თვეში კი 9800 კაცამდე”, - ამბობს ახალციხის ციხის საზოგადოებასთან ურთიერთობის სამსახურის უფროსი ლილი გოზალიშვილი.

მიმდინარე წელს ახალციხის ციხის ტერიტორიის დათვალიერება უფასო გახდა ომის ვეტერანებისთვის. რაც შეეხება ბილეთების ღირებულებას, ტარიფები იგივე დარჩა:
სკოლის მოსწავლე- 1 ლარი;
სტუდენტი -1,5 ლარი;
ვიზიტორი -5 ლარი;
ვიზიტორი (მრავალჯერადი-მომსახურება დღის განმავლობაში)- 7 ლარი;

გიდის მომსახურება ქართულ ენაზე 10 ლარია, უცხო ენაზე კი 20 ლარი. წელს ციხეს აუდიო გიდიც დაემატა.

”აიპედები გვაქვს, სადაც ინფორმაცია ჩაიწერა სამ ენაზე. მსურველს შეეძლება ყურსასმენებით მოისმინოს, ციხის იმ ნაწილის ისტორიის შესახებ, რომელიც სურს. მომსახურების თანხა 10 ლარია”, - განმარტავს ლილი გოზალიშვილი.

შესვლა უფასოა საქართველოს და უცხოეთის მუზეუმების თანამშრომლებისთვის, 6 წლამდე ასაკისა და მიუსაფარი ბავშვებისათვის, სოციალურად დაუცველ პირთათვის, შეზღუდული შესაძლებლობის მქონე პირთათვის და იძულებით გადაადგილებულ პირთათვის.

[თინათინ ზაზაძე, ახალციხე]