პროკურორი: ვვარაუდობთ, რომ დედა–შვილების მკვლელობაში ბრალდებული მარტო არ მოქმედებდა

ეს ერთ–ერთი არგუმენტი იყო, რის გამოც დღეს, 13 ივლისს გამართულ სასამართლო პროცესზე, პროკურორმა მამუკა ქომოშვილმა ბრალდებულისთვის აღკვეთის ღოისძიების სახით პატიმრობის შეფარდება ითხოვა.

„გამოძიება აღნიშნულ ვერსიაზე მუშაობს. ვვარაუდობთ, რომ იგი არ მოქმედებდა მარტო და თავისუფლებაში ყოფნით შეიძლება ზემოქმედება განახორციელოს მოწმეებზე, მის სასარგებლოდ ჩვენების მისაცემად“, – განმარტა პროკურორმა.

პატიმრობის შეფარდების თხოვნისთვის პროკურატურას სხვა არგუმენტებიც ჰქონდა.

„მას ბრალი ედება განზრახ, განსაკუთრებით მძიმე კატეგორიის დანაშაულის ჩადენაში; არსებობს მიმალვის საფრთხე, ის საზღვრისპირა დასახლებაში ცხოვრობს; ბრალდების მხარე ვვარაუდობთ, რომ თავისუფლებაში მყოფი შესაძლოა მიემალოს გამოძიებას, რადგან მტკიცებულების განადგურების მიზნით სახლს ცეცხლი წაუკიდა. ჯერ კიდევ მიმდინარეობს გამოძიება, საქმეზე ჩასატარებელი როგორც ოპერატიული სამძებრო, ასევე საგამოძიებო მოქმედებები გარკვეული ფაქტობრივი გარემოებების დაზუსტების მიზნით. აღკვეთის ღონისძიებად პატიმრობის გამოყენება, ერთადერთი საშუალებაა, რათა თავიდან იქნეს აცილებული ბრალდებულის მხრიდან ახალი დანაშაულის ჩადენა“, – განმარტა პროკურორმა.

მოსამართლემ გაიზიარა პროკურატურის არგუმენტები და ბრალდებულს აღკვეთის ღონისძებად პატიმრობა შეუფარდა.

„არსებობს მაღალი ალბათობა, რომ ბრალდებული შეეცდება გაანადგუროს მტკიცებულებები. აქედან გამომდინარე, სასამართლომ დააკმაყოფილა პროკურორის შუამდგომლობა“, – განაცხადა დღევანდელ სასამართლო პროცესზე მოსამართლე გოჩა ჯეირანაშვილმა.

შეგახსენებთ, ახალციხის რაიონულ სასამართლოში პროცესი დღეს, 13 ივლისს გაიმართა. სასამართლო სხდომა დაახლოებით ერთი საათის განმავლობაში მიმდინარეობდა.

„ნოდარ ა–ს ბრალად აქვს წარდგენილი დამამძიმებელ გარემოებაში განზრახ მკვლელობა ორი ან მეტი პირის მიმართ, რაც სასჯელის სახით და ზომად ითვალიწინებს თავისუფლების აღკვეთას 16–დან 20–წლამდე, ან უვადო პატიმრობას. შესაბამისად ჩვენი შუამდგომლობა დაკმაყოფილდა“, – განაცხადა მამუკა ქომოშვილმა.

პროკურორის შუამდგომლობას ბრალდებული უსიტყვოდ დაეთანხმა. ნოდარ ა.–ს ინტერესებს სასამართლოში სახაზინო ადვოკატი ტარიელ ბალაბანიშვილი იცავს.

„ბრალდებულის სურვილის შესაბამისად, ამ ეტაპზე, დაცვის მხარე დაეთანხმა პროკურორს“, – განაცხადა იურიდიული დახმარების სამსახურის სამცხე–ჯავახეთის ბიუროს ადვოკატმა ტარიელ ბალაბანიშვილმა.

წინასასამართლო სხდომა 31 აგვისტოს, 14:00 საათზე ჩაინიშნა.

შეგახსენებთ, 10 ივლისს, ახალქალაქში, სოფელ ვაჩიანში, მეზობლებმა დედა, 37 წლის ქალი და მისი სამი შვილი საკუთარ სახლში გარდაცვლილი ნახეს. იმავე დღეს სამართალდამცველებმა მკვლელობის ბრალდებით იმავე სოფელში მცხოვრები, 1992 წელს დაბადებული ნოდარ ა. დააკავეს.

[თინათინ ზაზაძე, ახალციხე]