რა გახდა ახალგაზრდა მამაკაცის დაჭრის მიზეზი - ადგილობრივების ვერსია

ახალციხეში, კოსტავას ქუჩაზე, დღეს, 22 ივლისს, დაახლოებით 20:30 საათზე ახალგაზრდა მამაკაცი დაჭრილი იპოვეს. მომხდარის ოფიციალური ვერსია ამ დრომდე უცნობია, თუმცა, არსებობენ თვითმხილველები, რომლებიც ამბობენ, რომ შემთხვევამდე დაახლოებით ნახევარი საათით ადრე 37 წლის დავით ხ.-ს ცენტრალურ პარკში 4 ახალგაზრდასთან შელაპარაკება მოუხდა.

მისი ნაამბობით, საღამოს, ცენტრალურ პარკში, სასროლ ტირთან 4 ახალგაზრდა მივიდა და დაინტერესდა, რა სათამაშოებს მოიგებდნენ გამარჯვების შემთხვევაში.

„მეპატრონეს აუშარდნენ, რატომ არ თამაშდება მანქანა, ეს რა სათამაშოებიაო. ლაპარაკიდან გავიგე, რომ ბათუმიდან იყვნენ ჩამოუსლი. ტირის მეპატრონე უხსნიდა, რომ ეს გასართობი სათამაშო იყო და სერიოზული პრიზები არ თამაშდებოდა. ამ ხმაურზე დათო მოვიდა და ტირის მეპატრონეს გამოექომაგა. ცოტა ხანს იკამათეს და დაიშალნენ. მაგრამ, მალევე სადღაც გაიქცა, მე ვერ დავაკავე“, - გვიამბობს ლაურა იარუშევსკი, რომელიც ცენტრალურ პარკში მუშაობს და კამათს შეესწრო.

მისივე თქმით, ამ ამბიდან ნახევარ საათში მომხდარის შესახებ შეიტყო.

შეგახსენებთ, ახალგაზრდა მამაკაცი დაჭრილი კოსტავას ქუჩაზე ნახეს. სასწრაფო დახმარების სამსახურმა იგი უნიმედი სამცხეს სამედიცინო დაწესებულებაში გადაიყვანა. ექიმების თქმით, მამაკაცს 10 წვრილი ჭრილობა აქვს გულმკერდის არეში.

ვინ და რა მუხლით დაიწყო მომხდარზე ძიება, "სამხრეთის კარიბჭე" შსს-დან ინფორმაციას ამ დრომდე ელოდება.

[sknews.ge]