ახალციხეში ახალგაზრდა მამაკაცის დაჭრაში ბრალდებულს ჯერ ბრალი არ წარდგენია

ახალგაზრდა მამაკაცის დაჭრაში ბრალდებული ახალციხეში მცხოვრები 20 წლის ბ.ხ-ა. იგი სამართალდამცავებმა გუშინ, 22 ივლისს, ახალციხეში, თამარაშვილის ქუჩაზე, შემთხვევიდან 15 წუთში დააკავეს.

„არაფერი ვიცით რა მოხდა, გუშინ შუადღემდე სახლში იყო. არც დაზარალებულს ვიცნობთ. ისეთი ბავშვია, თუ ვინმემ მდგომარეობიდან არ გამოიყვანა, ასეთ რამეს არ ჩაიდენდა. ბუნებრივია, არ ვამართლებ მის საქციელს, მაგრამ რადგან არ ვიცი რა მოხდა, ჯერ არაფრის თქმა არ შემიძლია“, - ამბობს დაკავებულის დედა.

ბ.ხ-ს ინტერესებს ადვოკატი ირაკლი ბარძიმაძე იცავს. მისი განცხადებით, ამ დრომდე დაკავებულისთვის ბრალი არ წაუყენებიათ და არც დაუკითხავთ: „ამბობს, რომ არაფერი ჩაუდენია და არ იცის დაკავებული რატომაა“.

შეგახსენებთ, 22 ივლისს, დაახლოებით 20:30 საათზე, ახალციხეში, კოსტავას ქუჩაზე, ახალგაზრდა მამაკაცი დაჭრილი ნახეს. მომხდარს შსს-ს სამცხე-ჯავახეთის სამხარეო მთავარი სამმართველო, სისხლის სამართლის კოდექსის 118-ე მუხლით იძიებს, რაც ჯანმრთელობის განზრახ ნაკლებად მძიმე დაზიანებას გულისხმობს.

[თამუნა უჩიძე, ახალციხე]