ახალციხეში ახალგაზრდა მამაკაცი დაჭრეს

დაჭრილი მამაკაცი 37 წლისაა. სასწრაფო დახმარების სამსახურმა იგი უნიმედი სამცხეს სამედიცინო დაწესებულებაში გადაიყვანა.

"აქვს მრავლობითი ჭრილობები გულმკერდის არეში, საკმაოდ მძიმე ავადმყოფია. ვერ ვიტყვი რამდენად შემავალია ეს ჭრილობები. აღმოვუჩინეთ პირველადი დახმარება და გადმოვიყვანეთ საავადმყოფოში", – ამბობს სასწარფო დახმარების ექიმი კონსტანტინე დგებუაძე.

ამ წუთებში დაჭრილს უნიმედი სამცხეს სამედიცინო დაწესებულებაში რენდგენოგრაფია და ექოსკოპია უტარდება. მის მდგომარეობაზე
საავადმყოფოში ოფიციალურ კომენტარს ჯერ არ აკეთებენ.

საავადმყოფოში იმყოფებიან დაჭრილის ახლობლებიც. ოჯახის წევრების თქმით, ახალგაზრდა მამაკაცი სახლიდან დილიდან გასული იყო. მას კონფლიქტი არავისთან ჰქონია. დაჭრილის ძმის თქმით, შემთხვევამდე ცოტა ხნით ადრე ძმა მასთან იმყოფებოდა, შემდეგ კი ძმის სახლი იმ მოტივით დატოვა, რომ სახლში მიდიოდა.

ერთ–ერთი თვითმხილველი ამბობს, რომ მამაკაცი სადაც ნახეს, იმ ადგილას არ დაუჭრიათ.

„საიდან გამოვიდა არ ვიცი, მაგრამ, დავინახე იმ ადგილას უცებ როგორ დაეცა. მე გავაჩერე პატრულიც“, – ამბობს იგი.

შემთხვევის ადგილას მობილიზებულია საპატრულო პოლიცია.







[sknews.ge]