ნიკოლოზ ანთიძემ კულტურული ძეგლების სარეაბილიტაციო სამუშაოები მოინახულა

ნიკოლოზ ანთიძე ჯერ ვარძიის სამონასტრო კომპლექსს ეწვია და ძეგლზე განხორციელებული სამუშაოები მოინახულა.

2015 წელს, ვარძიის სამონასტრო კომპლექსზე ჩატარდა არქეოლოგიური სამუშაოები, რის შედეგადაც გამოვლინდა ორი ახალი იარუსი (ათი გამოქვაბული, აქედან ორი დარბაზული ტიპის და სამეურნეო დანიშნულების ოთახები), ჩატარდა კლდის გამაგრებითი სამუშაოები, ნაშალი ქვისგან გაიწმინდა სამრეკლოს და „საპატარძლოს“ მიმდებარე ტერიტორია, დამთვალიერებელთა უსაფრთხოების მიზნით გაკეთდა ქვის დამჭერი ბადე, მოეწყო ინფრასტრუქტურა და დასრულდა საერთაშორისო ინსტიტუტების მიერ (ლონდონის კურტოს ინსტიტუტი) ვარძიის ღვთისმშობლის ეკლესიის კედლის მხატვრობის წინასაპროექტო კვლევითი სამუშაოები. 2014 წელს, საქართველოს კულტურული მემკვიდრეობის დაცვის ეროვნულმა სააგენტომ მეტეო და სეისმო სადგურები შეიძინა, რომელიც 2015 წელს დამონტაჟდა და მიმდინარეობს მონაცემთა დამუშავება.

სამცხე - ჯავახეთის რეგიონში, ეტაპობრივი სარეაბილიტაციო სამუშაოები ჩატარდა ასევე თისელის ეკლესიაზე, საფარის სამონასტრო კომპლექსზე და შორეთის სამონასტრო კომპლექსზე.

საქართველოს კულტურული მემკვიდრეობის დაცვის ეროვნული სააგენტოს 2015 წლის სახელმწიფო პროგრამის ფარგლებში რეაბილიტაცია სამონასტრო კომპლექსის მთავარ, წმ. საბას სახელობის გუმბათიან ტაძარს ჩაუტარდა. რეაბილიტაციის შედეგად ტაძარი სრულად არის აღდგენილი.

თისელის ჯვარ - გუმბათოვანი ეკლესია ტყეში მდებარეობს, ტაძრიდან აღმოსავლეთით ციხის ნანგრევია, ხოლო ხეობის სიღრმეში დარბაზული ეკლესია და სამონასტრო კომპლექსია განლაგებული, სხვადასხვა დანიშნულების დანგრეული ნაგებობების სახით. შემორჩენილია სამონასტრო კომპლექსის გალავნის ნანგრევებიც.

საქართველოს კულტურული მემკვიდრეობის დაცვის ეროვნული სააგენტოს 2015 წლის სახელმწიფო პროგრამის ფარგლებში დასავლეთ მკლავის სარეაბილიტაციო სამუშაოები განხორციელდა: აღდგენილია კედელი და თაღები (თლილი ქვით), ასევე დასავლეთ მკლავის ორი სამრეკლო და შიდა ფასადი, მოეწყო დროებითი გადახურვა.

2015 წელს რეაბილიტაციის პირველი ეტაპი დასრულდა შორეთის სამონასტრო კომპლექსში, სადაც გამაგრდა საძირკველი, გადაეწყო და გამაგრდა ჩრდილოეთის კედელი.

[sknews.ge]