ელგუჯა ბიჭაშვილი: ‘ახალციხის ციხეზე კადრები გაბერილი არასოდეს ყოფილა’

ელგუჯა ბიჭაშვილი ბოლო პერიოდში ახალციხის ციხის ირგვლივ ატეხილ აჟიოტაჟსა და ახალციხის მერის, გიორგი კოპაძის პრესკონფერენციას გამოეხმაურა. ბიჭაშვილი ამბობს, რომ ქალაქის მერის ნათქვამს, იმის შესახებ, რომ ციხეში ამდენი კადრი საჭირო არ იყო, არ იზიარებს.

„გიორგი კოპაძემ ალბათ ვერ ერკვევა, რომ ახალციხის ციხე 7 ჰექტარზეა გაშენებული. იმ თანამშრომლებს, რომლებიც შეამცირეს, ყველას თავისი ტერიტორია ჰქონდა გამოყოფილი და უვლიდა. ყველაფერი იდეალურად იყო: დასუფთავება, გამწვანება, წყალმომარაგება. რამდენიმე ადამიანია საჭირო, რომ ძვირადღირებულ წყალსაქაჩებს მოუარონ, ასევეა განათების კუთხითაც. ამ ყველაფერს ერთი კაცი ვერ მოუვლის, ამიტომ არის, რომ დღეს ციხეზე ყველაფერი მოუწესრიგებელია“, – ირწმუნება ციხის ყოფილი დირექტორი.

ელგუჯა ბიჭაშვილი ამბობს, რომ მისი ხელმძღვანელობის პერიოდში ციხეს გაცილებით მეტი უცხოელი და ადგილობრივი ტურუსტი სტუმრობდა: „გადახედოს მერმა მაშინდელ მომსახურებას, ტურისტების რაოდენობას, შემოსავალს და დღევანდელ მონაცემებს. მან არ იცის, რა არის მენეჯმენტი, გაბერილი კადრები მერიასა და საკრებულოშია“.

შეგახსენებთ, რომ 2014 წლის დეკემბრიდან ახალციხის ციხემ ხელშეკრულებით აყვანილი თანამშრომლებისა და შტატების შემცირება დაიწყო. ადგილობრივმა ბიუჯეტმა კი ციხეს სუბსიდია შეუმცირა. ციხეში მომხდარ მოვლენებს სისტემატურად აშუქებდა "სამხრეთის კარიბჭე", თემა გააშუქა „რუსთავი 2“–მაც, გადაცემა "პოსტკრიპტუმში" გააშუქა. მედიაში გავრცელებული ამბების შემდეგ, ახალციხის მერმა სპეციალური ბრიფინგი გამართა. კოპაძემ განმარტა, რომ ციხეში შტატების შემცირება ადგილობრივი ბიუჯეტიდან სუბსიდიის შემცირებამ გამოიწვია. მისივე თქმით ახალციხის ციხეზე 104 თანამშრომელი მუშაობდა. 70 ადამიანზე მეტი ხელშეკრულებით იყო აყვანილი, რაც ზედმეტი იყო. გარდა ამისა, მერმა განაცხადა, რომ დაფინანსების შემცირების შემდეგ, ციხის ადმინისტრაციამ მარკეტინგის გაუმჯობესება დაიწყო.

[მანანა სარაშვილი, ახალციხე]