ვინ არის ასპინძის მუნიციპალიტეტის საკრებულოს თავმჯდომარე მამუკა მელიქიძე

მამუკა მელიქიძე ასპინძის საკრებულოს თავმჯდომარედ 14 ივლისს, 21 ხმით, 6–ის წინააღმდეგ აირჩიეს. იგი ამბობს, რომ ეს შეთავაზება მისთვის მოულოდნელი არ იყო.

„ორი არჩევნების შტაბის უფროსი და პარტიის თავმჯდომარე ვარ. აქედან გამოდინარე, გადაწყვიტეს, რომ მე ვყოფილიყავი საკრებულოს თავმჯდომარე. თუ რამე არსებობს ასპინძაში მოსაგვარებელი, შეძლებისდაგვარად ყველაფერს გავაკეთებთ. მაქსიმალურად ვეცდებით, რომ ამომრჩეველს ნდობა გაუმართლოთ“, – ამბობს იგი.

მამუკა მელიქიძე 1971 წლის 26 ნოემბერს დაიბადა. დაამთავრა ასპინძის საშუალო სკოლა. შემდეგ სამხედრო სავალდებულო სამსახურში მსახურობდა.
1996 წელს თბილისის ჰუმანიტარული ინსტიტუტი დაამთავრა. პროფესიით ეკონომისტია, წარმოების მენეჯერი.
1998 წლამდე ასპინძაში შემნახველ სალაროში მუშაობდა.
1999–დან 2005 წლამდე ვალეს საბაჟო გამშვებ პუნქტში უფროსის მოადგილედ გადავიდა. მოგვიანებით, თბილისში, სამშენებლო ფირმა „21–ე საუკუნე“–ში ფინანსური დირექტორი იყო.
2007 წელს ყაზახურ ბანკში ერთ–ერთი განყოფილების უფროსად დაიწყო მუშაობა.
2013 წლის 17 იანვარს ასპინძაში დაბრუნდა და „ქართული ოცნების“ რაიონული ორგანიზაციის ხელმძღვანელად დაინიშნა.

„მომავალ კონფერენციამდე პარტიის თავმჯდომარედ ვრჩები. აქტივის კოორდინატორიც საკრებულოს წევრია. ყველა ეს პიროვნებები დარჩებიან, მხოლოდ ახალგაზრდული ფრთის წარმომადგენელი შეიცვლება. პარტიის ოფისი ალბათ გააგრძელებს ფუნქციონირებას“, – ამბობს მამუკა მელიქიძე.

[თინათინ ზაზაძე, ასპინძა]