ასპინძის მუნიციპალიტეტის საკრებულოს თავმჯდომარე და მოადგილე აირჩიეს

ასპინძის მუნიციპალიტეტის საკრებულოს პირველ სხდომაზე ისევე როგორც თავმჯდომარის, ასევე მოადგილის კანდიდატურები მხოლოდ „ქართული ოცნების“ წარმომადგენლებმა დაასახელეს. თავმჯდომარედ მამუკა მელიქიძე, მის მოადგილედ კი ბესიკ ბერიძე დასახელდა.

ორივე მათგანმა საკრებულოს სრული მხარდაჭერა მოიპოვა. მელიქიძესაც და ბერიძესაც მხარი საკრებულოს 27–ვე დეპუტატმა დაუჭირა.

მამუკა მელიქიძე ასპინძის მუნიციპალიტეტის 2014 წლის მოწვევის საკრებულოს თავმჯდომარე იყო. ბესიკ ბერიძე კი ამავე მოწვევის საკრებულოში ფრაქცია „ქართულ ოცნებას“ ხელმძღვანელობდა.

მათ საკრებულოს სრული მხარდაჭერისთვის მადლობა გადაუხადეს და დეპუტატებს დაპირდნენ, რომ მომავალი ოთხი წლის განმავლობაში ასპინძის მუნიციპალიტეტის წინ სვლის მიზნით თავდაუზოგავად იმუშავებენ.

„ამ საკრებულოში ოპოზიციის გვერდითაც ვიქნები. მომავალ წლებში ერთად ბევრ კარგ საქმეს გავაკეთებთ“, – განაცხადა სხდომაზე მამუკა მელიქიძემ.

შეგახსენებთ, ასპინძის საკრებულოში, 27 დეპუტატიდან, 22 „ქართული ოცნებიდან“, 5 კი ოპოზიციური პარტიებიდან იქნება. ხუთივე მათგანი საკრებულოში პროპორციული წესით მოხვდა.

ბესიკ ბერიძე

[sknews.ge]