3 'ოცნება', 1 'რესპუბლიკელი' და 1 'კონსერვატორი' – ადიგენში მუდმივმოქმედი კომისიები ჩამოაყალიბეს

ადიგენის მუნიციპალიტეტის საკრებულოში ხუთი მუდმივმოქმედი კომისია ჩამოყალიბდა: კულტურის, განათლებისა და ახალგაზრდულ საქმეთა; გარემოს დაცვისა და აგრარულ საკითხთა; ჯანდაცვისა და სოციალურ საკითხთა; საფინანსო საბიუჯეტო და ქონების მართვისა და იურიდიულ საკითხთა. აირჩიეს ხუთივე კომისიის თავმჯდომარეც.

კულტურის, განათლებისა და ახალგაზრდულ საქმეთა კომისიის თავმჯდომარეობაზე სამი კანდიდატი იბრძოდა: ალექსი გიგოლაშვილი, "საქართველოს რესპუბლიკური პარტიიდან", რევაზ გოგნაძე – პოლიტიკური მოძრაობა "მრეწველობა გადაარჩენს საქართველოდან" და რატი ტატალაშვილი – "ერთიანი ნაციონალური მოძრაობიდან".

16 ხმით აღნიშნული კომისიის თავმჯდომარე ალექსი გიგოლაშვილი გახდა. ერთი ხმა რატი ტატალაშვილმა მიიღო, ერთი რევაზ გოგნაძემ, ხოლო ერთი ბიულეტენი გაბათილდა.

გარემოს დაცვისა და აგრარულ საკითხთა კომისიის თავმჯდომარე, 26 ხმით 4–ის წინააღმდეგ, "ქართული ოცნების" მიერ წარდგენილი ალექსი ენდელაძე გახდა. მას კონკურენტი არ ჰყავდა.

ასევე კონკურენტი არ ჰყავდა მუხრან ხარშილაძეს, რომელიც "საქართველოს კონსერვატიულმა პარტიამ" იურიდიულ საკითხთა კომისიის თავმჯდომარეობის კანდიდატად წარადგინა.

ჯანდაცვისა და სოციალურ საკითხთა კომისიის თავმჯდომარე "ქართული ოცნებიდან" იმედა ხომასურიძე გახდა, კონკურენტი არც მას ჰყოლია.

საფინანსო–საბიუჯეტო და ქონების მართვის კომისიის თავმჯდომარე ასევე "ქართული ოცნების" წევრი იმედა მღებრიშვილი გახდა. კონკურენტი არც მას ჰყავდა.

[მანანა სარაშვილი, ადიგენი]