ახალციხის მუნიციპალიტეტის საკრებულოში მუდმივმოქმედ კომისიებს 'ოცნების' წევრები უხელმძღვანელებენ

ახალციხის მუნიციპალიტეტის საკრებულოში ხუთი მუდმივმოქმედი კომისია შექმნეს: კულტურის, განათლებისა და ახალგაზრდულ საქმეთა; გარემოს დაცვისა და აგრარულ საკითხთა; ჯანდაცვისა და სოციალურ საკითხთა; საფინანსო საბიუჯეტო და ქონების მართვისა და იურიდიულ საკითხთა. უკვე აირჩიეს 5–ვე კომისიის თავმჯდომარეც.


პირველად კენჭისყრა კულტურის, განათლებისა და ახალგაზრდულ საქმეთა კომისიის თავმჯდომარის ასარჩევად გაიმართა.

თავმჯდომარეობის კანდიდატად "ქართულმა ოცნებამ" ვასილ სისვაძე დაასახელა. "ნაციონალურმა მოძრაობამ" კი რობერტ მურადიანი. 21 ხმით 9-ის წინააღდეგ, აღნიშნული კომისიის თავმჯდომარე ვასილ სისვაძე გახდა.


გარემოს დაცვის და აგრარულ საკითხთა კომისიის თავმჯდომარეობის კანდიდატად "ქართულმა ოცნებამ" ბესიკ გოგსაძე წარადგინა. მას კონკურენტი არ ჰყოლია.

შესაბამისად, 23 ხმით 5-ის წინააღმდეგ, გარემოს დაცვის და აგრარულ საკითხთა კომისიის თავმჯდომარე ბესიკ გოგსაძე გახდა. 2 ბიულეტინი ბათილად იქნა ცნობილი.


ასევე, კონკურენტი არ ჰყოლია ჯანდაცვის და სოციალურ საკითხთა კომისიის თავმჯდომარეობის კანდიდატს „ქართული ოცნებიდან“ ალექსანდრე ლაბაძეს. იგი აღნიშნული კომისიის თავმჯდომარე გახდა 22-ი ხმით 8-ის წინააღმდეგ.


საფინანსო–საბიუჯეტო და ქონების მართვის კომისიის თავმჯდომარეობის კანდიდატად „ნაციონალური მოძრაობიდან“ კობა სანდროშვილი დასახელდა. ამავე პოსტზე „ქართულმა ოცნებამ“ თეიმურაზ ბარძიმაძის კანდიდატურა წარადგინა. 22 ხმით 8-ის წინააღმდეგ საფინანსო–საბიუჯეტო და ქონების მართვის კომისიის თავმჯდომარე თეიმურაზ ბარძიმაძე გახდა.


იურიდიულ საკითხთა კომისიის თავმჯდომარედ „ქართული ოცნების“ წარმომადგენელი თამარ გოგინაშვილი აირჩიეს. მასთან ერთად აღნიშნული კომისიის თავმჯომარის კანდიდატად „ნაციონალური მოძრაობიოდან“ დასახელებული იყო კახაბერ მოდებაძე. თუმცა, იურიდიულ საკითხთა კომისიის თავმჯდომარედ, 22 ხმით 8-ის წინააღმდეგ, თამარ გოგინაშვილი გავიდა.

[თამუნა უჩიძე, ახალციხე]