ასპინძაში 5–ის ნაცვლად, 3 მუდმივმოქმედი კომისია შექმნეს

დღეს, 14 ივლისს, ასპინძის მუნიციპალიტეტის საკრებულოს სხდომაზე, საკრებულოს თავმჯდომარისა და მოადგილის არჩევის შემდეგ მუდმივმოქმედი კომისიის თავმჯდომარეები აირჩიეს.

საფინანსო–საბიუჯეტო კომისიის თავმჯდომარედ „ქართული ოცნების“ წევრი, ხიზაბავრის მაჟორიტარი დეპუტატი თემურ პლაჭიაშვილი აირჩიეს. პლაჭიაშვილს კონკურენტი არ ჰყოლია. იგი, 27–ვე დეპუტატმა, ფარული კენჭისყრით, ერთხმად აირჩია.

ჯანდაცვისა და სოციალურ საკითხთა კომისიის თავმჯდომარედ დაბა ასპინძის მაჟორიტარი დეპუტატი დავით ფართლაძე აირჩიეს. პლაჭიაშვილის მსგავსად კონკურენტი მასაც არ ჰყოლია.

„15 წელია მოქმედი ქირურგი ვარ. 9 წლის განმავლობაში სასწრაფო სამედიცინო სამსახურის დირექტორი ვიყავი. ვმუშაობდი სასწრაფოს რეგიონული სამმართველოს უფროსად. ნაცნობი თემაა ჩემთვის, ამ კუთხით მოსაგვარებელი ძალიან ბევრია. საკრებულოს მხარდაჭერითა და გამგეობის მონაწილოებით, ბევრი პრობლემის მოგვარებას შევძლებთ“, – ამბობს დავით ფართლაძე.

გარემოს დაცვისა და აგრარულ საკითხთა კომისიის თავმჯდომარედ საკრებულოს წევრებმა სოფელ ოთის მაჟორიტარი დეპუტატი, ასპინძისა და სოფელ ოთის ტერიტორიული ორგანოს ყოფილი რწმუნებული, ბესიკ მაგრაქველიძე აირჩიეს.

„ყველანაირად ვეცდები ჩემს გუნდთან, საკრებულოს წევრებთან ერთად მოვაგვარო პრობლემები“, – განაცხადა ბესიკ მაგრქველიძემ.

ასპინძის მუნიციპალიტეტის საკრებულოს თავჯდომარის მოადგილის ნუგზარ ლონდარიძის განმარტებით, იურიდიულ საკითხთა და კულტურის, განათლების, სპორტისა და ახალგაზრდულ საქმეთა კომისიების თავმჯდომარეებს უახლოეს დღეებში აარჩევენ.

[თინათინ ზაზაძე, ასპინძა]