სამცხე–ჯავახეთის უნივერსიტეტში პროფესორ ვალერი სილოგავას სახელობის კაბინეტი გაიხსნა

ვალერი სილოგავას სახელობის კაბინეტი სამცხე–ჯავახეთის სახელმწიფო უნივერსიტეტის პირველ კორპუსში გაიხსნა. კაბინეტში ძირითადად ეპიგრაფიკული კვლევები ჩატარდება.

კაბინეტის გახსნის შემდეგ, უნივერისტეტის ბიბლიოთეკაში, ვალერი სილოგავა მეგობრებმა და კოლეგებმა გაიხსენეს. პროფესორის შესახებ პრეზენტაცია მისმა ყოფილმა სტუდენტმა თეა თათენაშვილმა მოამზადა.
„ერთი წლის განმავლობაში ვაგროვებდი ვალერი სილოგავას შესახებ ინფორმაციას. ჩემთვის დიდი პატივია, რომ ვალერი სილოგავას მრავალრიცხოვან სტუდენტებს შორის, მე მხვდა წილად ეს ბედნიერება“, – ამბობს იგი.

დღესვე, უნივერსიტეტში გაიმართება რესპუბლიკური სამეცნიერო კონფერენცია ონომასტიკაში, რომელიც პროფესორების: ვალერი სილოგავასა და სერგო მელიქიძის ხსოვნას მიეძღვნება. კონფერენცია უნივერსიტეტის მეორე კორპუსში, პავლე ზაზაძის სახელობის საკონფერენციო დარბაზში გაიმართება, სადაც ვალერი სილოგავასა და სერგო მელიქიძეს კიდევ ერთხელ გაიხსენებენ.

გარდა ამისა, ვალერი სილოგავას სახელი მიენიჭება ახალციხეში,ზარზმელის ქუჩაზე ასასვლელ აღმართს.

ისტორიის მეცნიერებათა დოქტორი, პროფესორი ვალერი სილოგავა1945 წლის 20 აპრილს დაიბადა. 1963 წელს დაამთავრა ფოთის მეხუთე საშუალო სკოლა, 1969 წელს წარჩინებით დაამთავრა თბილისის სახელმწიფო უნივერსიტეტის ისტორიის ფაკულტეტი და 1972 წელს კ. კეკელიძის სახელობის ხელნაწერთა ინსტიტუტის ასპირანტურა, წყაროთმცოდნეობისა და ისტორიოგრაფიის სპეციალობით. აქ ჩამოყალიბდა, როგორც მკვლევარი და მეცნიერი, სადაც გამოიკვეთა მისი სამეცნიერო საქმიანობის მიმართულებებიც – ეპიგრაფიკა, პალეოგრაფია, დიპლომატიკა, ქრონოლოგია, „ქართლის ცხოვრება“ და ხელნაწერთმცოდნეობა.

ვალერი სილოგავა 20 წიგნის, 100–მდე სამეცნიერო სტატიისა და რამდენიმე ასეული საგაზეთო და საენციკლოპედიო პუბლიკაციის ავტორია. მას პირველს მიენიჭა საქართველოს მეცნიერთა ეროვნული აკადემიის ე. თაყაიშვილის სახელობის პრემია. საქართველოს პრეზიდენტის განკარგულებით სილოგავა დაჯილდოვებულია ღირსების ორდენით.

ვალერი სილოგავა სამცხე–ჯავახეთის სახელმწიფო უნივერისტეტში 20 წელზე მეტ ხანს მუშაობდა. ის 2011 წლის 17 მარტს გარდაიცვალა.


[მანანა სარაშვილი, ახალციხე]