ახალციხეში ვალერი სილოგავას სახელობის აღმართი იქნება

ახალციხის მუნიციპალიტეტის საკრებულოს რიგით მეშვიდე სხდომაზე, რომელიც 9 ივნისს გაიმართა, ერთ–ერთ საკითხად სამცხე–ჯავახეთის სახელმწიფო უნივერსიტეტის რექტორის მერაბ ბერიძის განცხადება განიხილეს.

უნივერსიტეტმა საკრებულოს ინიციატივით მიმართა, რომ ახალციხეში ზარზმელის ქუჩამდე მისასვლელ აღმართს ისტორიკოს ვალერი სოლოგავას სახელი მიენიჭოს. ისტორიკოსის, რომელიც სამცხე–ჯავახეთის სახელმწიფო უნივერსიტეტში 20 წელზე მეტ ხანს მუშაობდა.

ვალერი სილოგავა უნივერსიტეტის საერთო საცხოვრებლის მესამე სართულზე ცხოვრობდა, საიდანაც ზარზმელის ქუჩა, ეგრეთ წოდებული „აძინაცეტების“ დასახლება ჩანს. იგი 2011 წელს გარდაიცვალა.

„ვალერი სილოგავამ თავისი მეცნიერული პროდუქციის დიდი ნაწილი ახალციხეში შექმნა. საერთო საცხოვრებელში ცხოვრობდა და ხშირად გასცქეროდა ამ აღმართს. უთქვამს კიდეც, ახალციხეში ყველა ქუჩას სახელი აქვს, ამ აღმართის გარდაო“, – ამბობს სამცხე–ჯავახეთის სახელმწიფო უნივერსიტეტის რექტორი მერაბ ბერიძე.

ზარზმელის ქუჩამდე მისასვლელი აღმართის გარდა, უნივერსტიტეტის ინიციატივაა ცხრა აპრილს ქუჩაზე ახლადგაკეთებულ ერთ–ერთ სკვერს ასტრონომ ევგენი ხარაძის სახელი მიენიჭოს.

„ევგენი ხარაძის დამსახურება ყველასთვის ცნობილია, გარდა იმისა, რომ მან შექმნა აბასთუმნის ასტროფიზიკური ობსერვატორია, მისი დამსახურება ძალიან დიდია ჩვენი უნივერსიტეტის წინაშე. თავიდანვე ჩვენთან იყო და ყველაფრს აკეთებდა რაც უნივერსიტეტს სჭირდებოდა. მისი დამსახურებაა, რომ ჩვენთან იყო მათემატიკა–ასტრონომიის ფაკულტეტი, რომ დღეს საქართველოში მხოლოდ ჩვენ გვაქვს ასტრონომიაში სადოქტორო პროგრამა და მხოლოდ ჩვენ გვექნება საბჭო, რომელზეც საქართველოში ყველა ასტრონომს შეეძლება სადოქტორო დისერტაციის დაცვა“, – ამბობს მერაბ ბერიძე.

ახალციხის მუნიციპალიტეტის საკრებულოს სხდომაზე დამსწრე დეპუტატებმა ზარზმელის ქუჩამდე მისასვლელი აღმართისთვის ვალერი სილოგავას სახელის მინიჭებას მხარი ერთხმად დაუჭირეს.

რაც შეეხება ცხრა აპრილის ქუჩაზე არსებულ სკვერს, საკრებულოს თავმჯდომარის ოლეგ სანდროშვილის განმარტებით, ვინაიდან სკვერის მშენებლობა ახლა დასრულდა, მიღება–ჩაბარების აქტი ჯერ გაფორმებული არ არის. ამიტომ აღნიშნულ სკვერს ამ ეტაპზე სახელწოდებას ვერ მიანიჭებენ.

[თამარ თოთაძე, ახალციხე]