ახალციხეში საცხოვრებული კორპუსის ორი სართული დაიწვა

ახალციხის სახანძრო სამსახურში აცხადებენ, რომ ხანძრის შესახებ შეტყობინება დაახლოებით 17:00 საათზე შევიდა. მეხანძრეების თქმით, ამ დროისთვის ცეცხლი ლიკვიდირებულია.

"ორივე სართულზე აივნის კარი დაიწვა, აივნის გვერდებზე ფიცრები იყო აჭედებული და იმას მოეკიდა. სახლში არაფერი დამწვარა. დროულად გაგვაგებინეს ხანძარი რომ იყო და სამი მანქანა მოვიდა შემთხვევის ადგილზე. ცეცხლის ლოკალიზებაც დროულად მოვახდინეთ და ლიკვიდაციაც. რამ გამოიწვია ხანძარი არ ვიცით, ამას გამოძიება დაადგენს", – ამბობს ახალციხის სახანძრო სამსახურის უფროსი პაატა კბილაშვილი.

თვითმხილველების თქმით, ხანძარი ჯერ მესამე სართულზე გაჩნდა, შემდეგ კი ცეცხლი მეოთხე სართულზე გადავიდა. მესამე სართულზე იმ დროისთვის ოჯახის მხოლოდ ერთი წევრი იმყოფებოდა. იგი ამბობს, რომ იმ დროს ეძინა და კვამლის სუნმა გამოაღვიძა. ოჯახის დანარჩენი წევრები, მცირეწლოვან ბავშვებთან ერთად, ხანძრის დაჩენის დროს ეზოში იყვნენ.

"მარტო ვიყავი, ყველა კარი ღია მქონდა, კვამლი რომ შევამჩნიე, ვიფიქრე მესამეზე რაღაც ხდება მეთქი და დაბლა სართულზე ჩავედი. იქ მცხოვრებს პატარა ბავშვები ჰყავს და მოვეხმარო დაბლა ჩაყვანაში–თქო", – გვითხრა მეოთხე სართულზე მცხოვრებმა ელიკო ტაბატაძემ.

ასპინძის ქუჩაზე ამ დრომდე რჩებიან სახანძრო–სამაშველო და სასწრაფო დახმარების სამსახურები და სამართალდამცველები. რამ გამოიწვია ხანძარი ამ ეტაპზე უცნობია.

საქართველოს შინაგან საქმეთა სამინისტროში აცხადებენ, რომ მომხდარს შსს სამცხე–ჯავახეთის სამხარეო მთავარი სამმართველოს ახალციხის რაიონული სამმართველო სსკ–ის 188–ე მუხლით იკვლევს, რაც ნივთის დაზიანებას გულისხმობს.











[SKnews.ge]