ახალციხეში ბაღის გარეშე 1200 ბავშვი დარჩა

გუშინ, 1 ივლისს, ახალციხის სკოლამდელი აღზრდის დაწესებულებებში სასწავლო პროცესი მოულოდნელად შეჩერდა. სასწავლო პროცესის მოულოდნელად შეწყვეტამ განსაკუთრებით იმ მშობლების უკმაყოფილება გამოიწვია, რომლებიც მუშაობენ.

ახალციხეში მცხოვრებ თამუნა ზუბაშვილს 5 წლის შვილი N3 საბავშვო–ბაღში დაყავს. სასწავლო პროცესის დროებით შეჩერების ამბავმა, ზუბაშვილი გამოუვალ მდგომარეობაში ჩააყენა.

„წინასწარ არავის გავუფრთხილებივართ. საღამოს, როცა მივედით ბავშვის გამოსაყვანად, გვითხრეს ბავშვები აღარ მოიყვანოთო. ვმუშაობ, სამსახურს ვერ გავაცდენდი და ამიტომ პატარა უფროს შვილს დავუტოვე, რომელიც 10 წლისაა. ძალიან ვნერვიულობ, როგორ იქნებიან სახლში“, – ამბობს იგი.

იგივე პრობლემის წინაშე აღმოჩნდა თათია ჯონსონიც, რომელსაც ორი მცირეწლოვანი შვილი N2 ბაგა–ბაღში დაჰყავს.

„ძიძა არ მყავს, არ ვიცი რა ვქნა. რემონტი გვაქვს სახლში და იძულებული ვარ სადმე წავიყვანო. შესაძლებელია დროებით ძიძა მომეძებნა, მაგრამ ამასაც დრო სჭირდება. ჩემი დაც მსგავს სიტუაციაშია, რომელსაც პატარა ჰყავს. მისი დედამთლი დარჩა სახლში და სამსახური გააცდინა იმისთვის, რომ ბავშვისთვის მიეხედა“, – ამბობს თათია ჯონსონი.

ააიპ ქალაქ ახალციხის სკოლამდელი აღზრდის დაწესებულებათა გაერთიანებაში განმარტავენ, რომ სწავლის შეწყვეტასთან დაკავშირებით წინასწარ ინფორმაცია არც მათ სამსახურს ჰქონდა.

„ჩვენც ფაქტის წინაშე დავდეგით და შევაჩერეთ სწავლა. ხელფასების გარეშე რჩებიან თანამშრომლებიც. გაუთვალისწინებელი რამ მოხდა, ჩვენი ბრალი არ არის. ყველაფერი მზად გვქონდა იმისათვის, რომ სწავლა არ შეგვეჩერებინა, მაგრამ შესყიდვების სააგენტომ გვითხრა, რომ არ შეიძლება ტენდერის გაგრძელებაო“, – განმარტავს ახალციხის სკოლამდელი აღზრდის დაწესებულებათა გაერთიანების დირექტორი ნანა გელაშვილი.

მისივე თქმით, როდის გაგრძელდება ბაღებში სწავლა ამ ეტაპზე უცნობია:" ჯერ უნდა დასრულდეს თვითმმართველი ქალაქისა და მუნიციპალიტეტის აღმასრულებელი და საკანონმდებლო ორგანოების დაკოომპექტება. გამგეობებმა უნდა მოგვცენ ოფიციალური წერილი, ვინ დაგვაფინანსებს და ამის მიხედვით უნდა დავრეგისტრირდეთ შესყიდვების სააგენტოს საიტზე, რათა უფლება მოგვეცეს შესყიდვების განხორციელებისა. თვითმმართველობიდან მოსულ წერილს ავტვირთავთ სააგენტოს საიტზე და დავრეგისტრირებით, მერე რას გვეტყვიან, არ ვიცით“.

შესყიდვების სააგენტოს ცხელ ხაზზე განგვიმარტეს, რომ ვინაიდან ორგანიზაციის ლიკვიდაცია მოხდა, დადებული ხელშეკრულებებიც გაუქმდა: „თუ მის ბაზაზე, ან მის ნაცვლად შეიქმნა ახალი ორგანიზაცია, რომელიც ასევე ბიუჯეტიდან მიიღებს დაფინანსებას, ის უნდა დარეგისტრირდეს შემსყიდველ ორგანიზაციად და შემდგომ გაფორმდება ახალლი ხელშეკრულება“.

თვითმმართველ ქალაქ ახალციხისა და ახალციხის თემის საბავშვო ბაღებში ამ დროისთვის დაახლოებით 1200 ბავშვი დადიოდა.

[თინათინ ზაზაძე, ახალციხე]