საბავშვო ბაღებში სასწავლო პროცესი 1 სექტემბრიდან განახლდება

სკოლამდელი აღზრდის დაწესებულებებში მოსამზადებელი სამუშაოები დღეიდან, 25 აგვისტოდან დაიწყო.

"1 სექტემბერს სწავლა ყველა საბავშვო ბაღში დაიწყება. თანამშრომლები უკვე ბაღებს აწესრიგებენ, განცხადებებს მიიღებენ", – ამბობს ახალციხის სკოლამდელი აღზრდის დაწესებულებათა გაერთიანების ხელმძღვანელი ნანა ბერიძე.

სიახლეა ისიც, რომ ბაგა–ბაღებში სწავლას ორწლამდე ასაკის აღსაზრდელებიც შეძლებენ. სწავლა ბავშვებისთვის კვლავ უფასო იქნება.

"ორ წლამდე ასაკის ბავშვების მიღება შესაძლებელია და შეზღუდული არ არის, მაგრამ ფიზიკურად ჯგუფებში ადგილი არაა. დღეს გვაქვს თათბირი მენეჯერებთან, მოიტანენ ბავშვთა რაოდენობებს, განცხადებებს და გადავხედავთ. კვირის ბოლოს გვეცოდინება ბავშვთა რაოდენობა", – ამბობს ნანა ბერიძე.

შეგახსენებთ, რომ ბაგა–ბაღებში სასწავლო პროცესი 1 ივლისს მოულოდნელად შეწყდა, რის გამოც დაახლოებით 1200 ბავშვი ბაღის გარეშე დარჩა.

სასწავლო პროცესის შეწყვეტამ, როგორც თანამშრომლების ასევე მშობლების უკმაყოფილება გამოიწვია.

ამ დრომდე გაურკვეველია აიღებენ თუ არა პედაგოგები ივნისის თვის ორი კვირის ხელფასს, რომელიც ადგილობრივი თვითმმართველობის არჩევნებამდე, ახალი ხელისუფლების მოსვლამდე დარჩა გაუცემელი.

"მე რაც შემეძლო, რომ ამ ადამიანებს დავხმარებოდი და მათ კუთვნილი ხელფასები მიეღოთ გავაკეთე. საკრებულოს სხდომაზე გავიტანე ეს საკითხი და დადებითადაც გადაწყდა, ჩემი უფლებამოსილება საიდანაც არის, იმ რიცხვიდან ხელფასს მიიღებენ“, – ამბობს ახალციხის მერი გიორგი კოპაძე და ამატებს, რომ დარჩენილი ხელფასი წინა ხელისუფლებას უნდა გაეცა. მისივე თქმით, ბაგა–ბაღების თანამშრომლებმა კუთვნილი ხელფასი აუცილებლად უნდა მიიღონ. ამისთვის შეუძლიათ სასამართლოსაც მიმართონ: "შეიძლება გამოინახოს სხვა გზაც, კანონმა მოგვცეს საშუალება, მაგრამ ამ დროსთვის არ გვაძლევს".

ახალციხის მუნიციპალიტეტის საკრებულოს ყოფილი თავმჯდომარე ოლეგ სანდროშვილი კი განმარტავს, რომ წინა ხელისუფლება მოქმედებდა ინსტრუქციის მიხედვით, რომელიც რეგიონული განვითარებისა და ინფრასტრუქტურის სამინისტროსგან მიიღეს.

[თინათინ ზაზაძე, ახალციხე]