ახალციხეში პროგრამის 'აწარმოე საქართველოში' პრეზენტაცია გაიმართება

საინფორმაციო შეხვედრა საქართველოს ეკონომიკისა და მდგრადი განვითარების სამინისტროსა და სამცხე-ჯავახეთის სამხარეო ადმინისტრაციის ორგანიზებით ეწყობა. შეხვედრის მიზანია პროგრამის გაცნობა ადგილობრივი მეწარმეებისა და ყველა დაინტერესებული პირისთვის.

შეხვედრაზე საქართველოს ეკონომიკისა და მდგრადი განვითარებისა და სოფლის მეურნეობის სამინისტროების წარმომადგენლები პროგრამის დეტალებზე ისაუბრებენ.

ღია კარის დღეს დაესწრებიან პროგრამაში მონაწილე მხარეები -კომერციული ბანკები, მეწარმეობის განვითარების სააგენტო და სოფლის მეურნეობის პროექტების მართვის სააგენტო, ასევე სამხარეო ადმინისტრაციისა და მხარის მუნიციპალიტეტების წარმომადგენლები.

შეხვედრა ხუთშაბათს, 3 ივლისს,13:00 საათზე, ახალციხის სახელმწიფო უნივერსიტეტის მე-2 კორპუსში გაიმართება (რუსთაველის ქ. N122).

პროგრამა ,,აწარმოე საქართველოში” საქართველოს მთავრობის ინიციატივით ხორციელდება და მისი მიზანია საქართველოში მეწარმეობის განვითარება, მეწარმე სუბიექტების მხარდაჭერა, ახალი საწარმოების შექმნის ხელშეწყობა, ამასთანავე კერძო სექტორის კონკურენტუნარიანობისა და საექსპორტო პოტენციალის ზრდა.

პროგრამის ფარგლებში მეწარმეებს შესაძლებლობა ეძლევათ ისარგებლონ ფინანსური, ინფრასტრუქტურული და საკონსულტაციო მხარდაჭერით.პროგრამა მოიცავს ორ მიმართულებას - სოფლის მეურნეობა და ინდუსტრია.

სამთავრობო პროგრამა "აწარმოე საქართველოში“ 1 ივნისიდან ამოქმედდა, რისთვისაც სახელმწიფო ბიუჯეტიდან 46 მლნ ლარია გამოყოფილი. აქედან სასოფლო-სამეურნეო პროდუქციის წარმოება-გადამუშავებაზე დაიხარჯება 30 მლნ ლარი, ინდუსტრიული პროდუქციის წარმოებაზე კი 16 მლნ ლარი.

[sknews.ge]