ბრიფინგი 'საქართველოს პატრიოტთა ალიანსის' კანდიდატებთან

გამგებლობის და მაჟორიტარობის კანდიდატებმა საარჩევნო პროგრამა წარადგინეს და ჟურნალისტების კითხვებს უპასუხეს. ვიდრე საარჩევნო პროგრამის წარდგენა დაიწყებოდა, პარტიის წარმომადგენელმა თამარ სამსონიძემ განმარტა, რატომ გადაწყვიტა პარტიამ თვითმმართველობის არჩევნებში მონაწილეობა.

„2012 წელს ხელისუფლებაში მოვიდა ახალი ძალა, რაშიც ჩვენი პარტიის თითოეული წევრი იყო ჩართული. რომ არა ჩვენი გუნდი და ცნობილი ციხის კადრები, არავინ იცის 2012 წლის პირველი ოქტმბრის არჩევნები როგორი შედეგით დამთავრდებოდა. ჩვენი ძალისხმევით რაღაც შედეგი გავაუმჯობესეთ, თუმცა აღარ გვეგონა, რომ იმ საკითხებზე კიდევ მოგვიწევდა საუბარი, რაზეც სააკაშვილის რეჟიმის დროს ვსაუბრობდით. იმ ძალამ რომელსაც ჩვენ გვერდით დავუდექით, ხალხს იმედები გაუცრუა. ჩვენ ვართ ახალი ძალა, რომელიც მოდის სერიოზული ამბიციებით, იმისთვის, რომ საქართველოში მდგომაროება. რადიკალურად შეცვალოს“, – ამბობს თამარ სამსონიძე და ამატებს, რომ იმას, რაც „ქართულმა ოცნებამ“ ვერ მოახერხა სამართლიანობის აღდგენის კუთხით, „პატრიოტები“ შეძლებენ.

მუნიციპალური ბინათმშენებლობა, უფასო პოლიკლინიკა და ჰოსპიტალი, 14 წლის ზევით ახალგაზრდებისთვის პროგრამირების უფასოდ შესწავლა, მცირე და საშუალო ბიზნესის განვითარებისთვის 4–დან 8 წლამდე, 10 ათასი ლარიდან 50 ათასი ლარის ჩათვლით უპროცენტო სესხების გაცემა და სოციალური პროგრამები – ის 5 ძირითადი საკითხია, რომლის მოგვარებასაც „საქართველოს პატრიოტთა ალიანსის“ გამგებლობის კანდიდატი მამუკა გოგოლაძე ამომრჩევლებს გამარჯვების შემთხვევაში ჰპირდება.

საარჩევნო პროგრამა წარადგინეს ახალციხის, ვალისა და ფერსის მაჟორიტარობის კანდიდატებმაც.

ახალციხის მაჟორიტარობის კანდიდატის თეა სამსონიძის თქმით, გამარჯვების შემთხვევაში პირველ რიგში ახალციხეში სამედიცინო დაწესებულებების პრობლემებზე იზრუნებს. შემდეგ კი ქალაქში სასმელ და საკანალიზაციო სისტემას მოაწესრიგებს.

„ჩვენ გვქონდა 600–საწოლზე გათვლილი, პროფესიონალი მედპერსონალით დაკომპლექტებული საავადმყოფო, თუმცა რატომღაც ძველმა მთავრობამ კერძო ინვესტორს ერთ ლარად გადასცა, ხომ შეიძლებოდა ერთ ლარად მუნიციპალიტეტს გადასცემოდა?!“,–ამბობს თეა სამსონიძე და ამატებს, რომ აუცილებლად იბრძოლებს აღნიშნული პრობლემის მოგვარებისთვის.

სოფელ ფერსის მაჟორიტარობის კანდიდატის კობა ჩოხელისთვის პრიორიტეტი სოფლის მეურნეობის განვითარებაა: „გლეხებს შევუქმნი ისეთ პირობებს, რომ მათ მოახდინონ მოსავლის რეალიზაცია, თუმცა მანამდე უნდა მოვაწესრიგოთ სარწყავი სისტემა და სოფლამდე მისასვლელი გზები“.

ეგრეთ წოდებული მეორე შახტის დასახლებაში საცხოვრებელი კორპუსების სახურავების შეცვლა, გაზიფიცირება და გზების რებილიტაცია – ის ძირითადი საკითხებია, რომლის მოგვარებასაც ვალეს მაჟორიტარობის კანდიდატი ბადრი დავლაშერიძე გამარჯვების შემთხვევაში ვალის მოსახლეობას ჰპირდება.

საარჩევნო პროგრამების წარდგენის შემდეგ კანდიდატებმა ჟურნალისტების კითხვებს უპასუხეს.



[მანანა სარაშვილი, ახალციხე]