ვინ არის ‘პატრიოტთა ალიანსის’ მაჟორიტარობის კანდიდატი სამცხეში

დავით გოგიჩაიშვილი ბორჯომელია. ამბობს, რომ ეს მისი პირველი ნაბიჯებია პოლიტიკაში. ამ დრომდე არცერთი პარტიის მხარდამჭერი არ ყოფილა:

„ყოველთვის მომხრე ვიყავი იმ პოლიტიკისა, რასაც „პატრიოტთა ალიანსი“ ატარებდა და შესაბამისად, ავირჩიე ეს პარტია. მინდა ჩავება აქტიურ პოლიტიკურ ცხოვრებაში, ვინაიდან, ტყუილი და შეუსრულებლი დაპირებები ამოუვიდა ხალხს ყელში, ერთი მათთაგანი მეც ვარ. მინდა, რომ ჩემი ახალგაზრდა ენერგიითა და შრომით გამოვადგე ხალხს და ჩემს სამშობლოს“.

მაჟორიტარობის კანდიდატი ყოფილი სამხედრო და ყოფილი სპორტსმენია: „აქამდე ვიყავი სპორტში, ფეხბურთს ვთამაშობდი. ახლა ისე ვეღარ ვთამაშობ. ვიყავი სამხედროც, თუმცა ყოფილი სამხედროები არ არსებობენ. სამჯერ ვარ ავღანეთში ნამყოფი. მთელი ცხოვრება ვემსახურებოდი ჩემს სამშობლოს“, - ამბობს კანდიდატი.

დავით გოგიჩაიშვილი ივანე ჯავახიშვილის სახელმწიფო უნივერსიტეტის კურსდამთავრებულია. ჰყავს მეუღლე და სამი შვილი.

[თაკო ფეიქრიშვილი]