ბრიფინგი 'ნინო ბურჯანაძე – ერთიანი ოპოზიციის' კანდიდატებთან

ვიდრე კითხვა – პასუხი დაიწყებოდა, ახალციხის მუნიციპალიტეტის გამგებლობის კანდიდატმა ოლეგ ძოწენიძემ და ახალციხის მერობის კანდიდატმა ზაზა ნათენაძემ პარტიის საარჩევნო პროგრამა წარადგინეს.

სოციალური პრობლემები, დასაქმება, ჯანდაცვა, სპორტი და განათლება – ის ძირითადი საკითხებია, რომლის მოგვარებასაც, ზაზა ნათენაძე, ამომრჩევლებს გამარჯვების შემთხვევაში ჰპირდება.

საარჩევნო პროგრამის პრეზენტაციის შემდეგ, კანდიდატებმა ჟურნალისტების კითხვებს უპასუხეს. ოლეგ ძოწენიძის თქმით, მათი მაჟორიტარობის კანდიდატებზე ზეწოლა ხორციელდება. მაგალითად, გუშინ, 4 ივნისს ადიგენის მუნიციპალიტეტის სოფელ უდეში მაჟორიტარობის კანდიდატმა კანდიდატურა მოიხსნა: „არ ვიცი რომელმა პოლიტიკურმა პარტიამ განახორციელა მასზე ზეწოლა, თუმცა ფაქტია, რომ ეს ადამიანი ისეა შეშინებული, მეორე დღეა ტელეფონი გათიშული აქვს“.

ძოწენიძე ამბობს, რომ პარტიებს არათანაბარ გარემოში უწევთ წინასაარჩევნო კამპანიის წარმოება: „სადაც გაიხედავ „ქართული ოცნების“ პლაკატებია გაკრული, ძირს, დახეულები კი ჩვენი პლაკატები ყრია. დილით გავაკრავთ და საღამოს უკვე განადგურებულია“.

ჟურნალისტების კითხვაზე, ვინ არის ყველაზე ძლიერი კონკურენტი, ზაზა ნათენაძეს პასუხის გაცემა უჭირს: „ყველა ადგილობრივი ვართ, დაბადებიდან ვიცნობთ ერთმანეთს და კარგი მეგობრებიც ვართ. პოლიტიკა ჩვენს ურთიერთობას ვერ შეცვლის, ამიტომ ამ კითხვაზე პასუხის გაცემა მიჭირს“.

კთხვაზე, როგორ აფასებენ „არასაპარლამენტო ოპოზიციიდან“ მერობის კანდიდატის ნატალი სისვაძის გადაწყვეტილებას კანდიდატურის მოხსნის თაობაზე, ოლეგ ძოწენიძე ამბობს, რომ ეს არასერიოზულ შთაბეჭდილებას ტოვებს: „ერთ დღეს გადაწყვიტო, რომ ახალციხის მერობისთვის იბრძოლო და არჩევნებამდე ერთი კვირით ადრე კანდიდატურა მოიხსნა, არასერიოზული ქმედებაა, მითუმეტეს თუ ადგილი არ აქვს ზეწოლას. ეს დიდი პასუხისმგებლობაა ამომრჩევლის და იმ ადამიანების წინაშე, რომლებმაც მერობის კანდიდატად დაასახელეს“.
კითხვაზე, ვისი მხარდაჭერის იმედი აქვთ, კანდიდატები პასუხობენ, რომ მათ ახალციხელი ხალხის დიდი თანადგომის იმედი აქვთ.



[მანანა სარაშვილი, ახალციხე]